వైయస్ జగన్ సమస్య పరిష్కారానికి తెలంగాణ మంత్రదండం?

న్యూఢిల్లీ: రాష్ట్రానికి సంబంధించి రెండు ప్రధాన సమస్యలు కాంగ్రెసు అధిష్టాన వర్గాన్ని పట్టి పీడిస్తున్నాయి. వాటిలో ఒకటి - కడప పార్లమెంటు సభ్యుడు వైయస్ జగన్ ధిక్కారం కాగా, రెండోది - తెలంగాణ సమస్య. ఎన్ని విధాలుగా ప్రయత్నించినప్పటికీ జగన్ దారికి రావడం లేదు. జగన్ సమస్యను మరింత జఠిలం చేస్తున్నారు. దానికితోడు తెలంగాణ సమస్య తీవ్ర రూపం దాలుస్తోంది. ఉప ఎన్నికల ఫలితాలతో బలం పుంజుకున్న తెలంగాణ రాష్ట్ర సమితి (తెరాస) వల్ల వచ్చే ఎన్నికల నాటికి తెలుగుదేశం పార్టీకే కాకుండా తమ పార్టీకి కూడా ప్రమాదం తప్పదని కాంగ్రెసు అధిష్టానం గుర్తించిందని అంటున్నారు. అంతేకాకుండా, తెలంగాణ నాయకులకూ సీమాంధ్ర నాయకులకూ మధ్య ఏ మాత్రం పడడం లేదు. పార్టీ సీమాంధ్ర, తెలంగాణ పార్లమెంటు సభ్యుల మధ్య పచ్చగడ్డి వేస్తే భగ్గుమంటోంది. ఈ రెండు సమస్యలకు పార్టీ అధిష్టానం ఒకే పరిష్కారాన్ని కనుక్కున్నట్లు ఓ ప్రముఖ దినపత్రిక వార్తాకథనాన్ని బట్టి తెలుస్తోంది.

తెలంగాణ ప్రాంతంలో కాంగ్రెస్ బలం పుంజుకోవాలంటే రాష్ట్ర విభజనకు అనుకూలంగా నిర్ణయం తీసుకోవాలని, అదే సమయంలో పార్టీపై జగన్ ప్రభావం పడకుండా, సీమాంధ్రలో చిరంజీవి వంటి శక్తుల మద్దతుతో పార్టీని బలోపేతం చేయాలని కాంగ్రెసు అధిష్టానం యోచిస్తున్నట్లు ఆ పత్రిక రాసింది. ఈ నేపథ్యంలో జగన్‌కు ఉద్వాసన పలకడం లేదా తనంతట తాను తప్పుకొనేలా చేయడం, తెలంగాణకు అనుకూలంగా నిర్ణయం తీసుకోవడం ఏకకాలంలో జరిగే అవకాశాలున్నాయని చెబుతున్నారు. తెలంగాణకు అనుకూలంగా నిర్ణయం తీసుకోవడానికి తగిన ఏర్పాట్లు కూడా పార్టీ అధిష్టానం చేస్తున్నట్లు తెలుస్తోంది. ఇందుకు అనుగుణంగా గడువు లోపలే శ్రీకృష్ణ కమిటీ నివేదిక సమర్పించే అవకాశాలున్నట్లు చెబుతున్నారు. రాష్ట్ర విభజనపై కమిటీ ఇప్పటికే ఓ నిర్ణయానికి వచ్చిందని అంటున్నారు. సాధ్యమైనంత త్వరగా జగన్ పై, తెలంగాణపై నిర్ణయం తీసుకుంటే మరో మూడేళ్లలో ఎన్నికలు వచ్చేనాటికి పార్టీని రెండు ప్రాంతాల్లోనూ బలోపేతం చేయవచ్చునని కాంగ్రెసు అధిష్టానం భావిస్తున్నట్లు తెలుస్తోంది.