కేశవరావు వైఖరితో రాజీనామాకు సిద్ధపడిన కపిల్ సిబాల్?

న్యూఢిల్లీ: ఆంధ్రప్రదేశ్ కు చెందిన రాజ్యసభ సభ్యుడు కె. కేశవరావు వైఖరితో కేంద్ర మానవ వనరుల శాఖ మంత్రి కపిల్ సిబాల్ తీవ్ర మనస్తాపానికి గురైనట్లు సమాచారం. మంత్రి పదవికి రాజీనామా చేసేందుకు కూడా ఆయన సిద్ధపడినట్లు ప్రచారం జరుగుతోంది. రాజ్యసభలో ఎడ్యుకేషన్ ట్రిబ్యునల్ బిల్లును కేశవరావు వ్యతిరేకించారు. దాంతో బిల్లు ఆమోదం ఆగిపోయింది. పార్టీలన్నీ మద్దతు తెలిపిన సమయంలో కేశవరావు వ్యతిరేకించడం కపిల్ సిబాల్ ను తీవ్రంగా బాధపెట్టినట్లు చెబుతున్నారు.

కేశవరావుపై కపిల్ సిబాల్ ప్రధాని డాక్టర్ మన్మోహన్ సింగ్ కు ఫిర్యాదు చేయనున్నట్లు తెలుస్తోంది. ఆ బిల్లును కేశవ రావు వ్యతిరేకించడం చర్చనీయాంశంగా మారింది. ఆంధ్రప్రదేశ్ కు చెందిన దగ్గుబాటి పురంధేశ్వరి కేంద్ర మానవ వనరుల శాఖ సహాయ మంత్రిగా ఉన్నారు. ఆ స్థితిలో కేశవరావు ఆ బిల్లును వ్యతిరేకించడం ఆసక్తిగా మారింది.