గ్రూప్ వన్ పై తెలంగాణ మంత్రుల మీద ఒత్తిడి

హైదరాబాద్: ఎపిపిఎస్సీ గ్రూప్ వన్ పరీక్ష వాయిదా కోసం తెలంగాణ మంత్రులపై ఒత్తిడి పెరుగుతోంది. న్యాయమైన తెలంగాణ వాటా తేల్చే వరకు పరీక్ష వాయిదా వేయాలని డిమాండ్ చేస్తూ తెలంగాణ విద్యార్థులు ఆందోళనను ఉధృతం చేశారు. ఆదివారం బంద్ జరిగే లోగానే పరీక్ష వాయిదా వేస్తూ నిర్ణయం తీసుకోవాలని విద్యార్థులు తెలంగాణ మంత్రులపై ఒత్తిడి తెస్తున్నారు. ఈ విషయంపై ముఖ్యమంత్రి కె. రోశయ్యకు విజ్ఞప్తి చేయడానికి తెలంగాణ మంత్రులు సమాయత్తమవుతున్నారు.

ఉస్మానియా విశ్వవిద్యాలయం విద్యార్థుల జెఎసి నాయకులు శనివారం ఉదయం హోం మంత్రి సబితా ఇంద్రారెడ్డిని కలిసి పరీక్షను వాయిదా వేయించాలని కోరారు. ఉన్నత విద్యా మంత్రి శ్రీధర్ బాబుపై కూడా ఒత్తిడి పెరుగుతోంది. రేపు ఆదివారం పరీక్ష సందర్భంగా శాంతిభద్రతల సమస్య తలెత్తుందనే అనుమానాలు వ్యక్తమవుతున్నాయి. ఈ స్థితిలో శాంతిభద్రతల దృష్ట్యా పరీక్షను వాయిదా వేయడం మంచిదని శ్రీధర్ బాబు అంటున్నారు.