అడ్డుకుంటే కఠిన చర్యలు తీసుకుంటాం: వెంకట్రామిరెడ్డి

హైదరాబాద్‌: గ్రూప్ వన్ పరీక్షను అడ్డుకోవడానికి ప్రశ్నపత్రాలు చించేయడం వంటి పనులకు పాల్పడితే కఠిన చర్యలు తీసుకుంటామని ఎపిపిఎస్సీ చైర్మన్ వెంకట్రామిరెడ్డి హెచ్చరించారు. చట్టప్రకారం చర్యలు తీసుకుంటామని ఆయన అన్నారు. రేపటి గ్రూప్‌ 1 పరీక్ష నిర్వహణకు సంబంధించి అన్ని ఏర్పాట్లు పూర్తి చేసినట్లు ఆయన శనివారం మీడియా ప్రతినిధులకు తెలిపారు. సమన్వయకర్తలు, లైజన్‌ అధికారులు పరీక్ష నిర్వహణకు సిద్ధంగా ఉన్నారని ఆయన చెప్పారు.

పరీక్ష నిర్వహణపై ఎలాంటి అనుమానాలకు తావులేదని వెంకట్రామిరెడ్డి వెల్లడించారు. రాష్ట్రవ్యాప్తంగా రేపటి గ్రూప్‌1 పరీక్షకు 1.90 లక్షల మంది దరఖాస్తు చేసుకున్నారని, ఇప్పటివరకు 1.30 లక్షల మంది అభ్యర్థులు హాల్‌టికెట్లను డౌన్‌లోడ్‌ చేసుకున్నారని చెప్పారు. హాల్‌టికెట్‌ డౌన్‌లోడ్‌లో సమస్యలుంటే దరఖాస్తు చలానా చూపించి పరీక్షకు హాజరుకావచ్చని ఆయన తెలిపారు. ఫిబ్రవరి తర్వాతే గ్రూప్‌1 మెయిన్స్‌ పరీక్ష ఉంటుందని చెప్పారు.