ఆ శక్తి వైయస్ జగన్ కుంటే సంతోషమే: జెసి దివాకర్ రెడ్డి

హైదరాబాద్: దేశంలో ఎవరినైనా ఎదిరించే శక్తి తమ కాంగ్రెసు పార్టీ పార్లమెంటు సభ్యుడు వైయస్ జగన్ కు ఉంటే సంతోషమేనని సీనియర్ శాసనసభ్యుడు జెసి దివాకర్ రెడ్డి వ్యాఖ్యానించారు. వైయస్ జగన్ ముఖ్యమంత్రి కావాలనేది మంత్రి బాలినేని శ్రీనివాస రెడ్డి వ్యక్తిగత అభిప్రాయం కావచ్చునని ఆయన మంగళవారం మీడియా ప్రతినిధులతో అన్నారు. ముఖ్యమంత్రి రోశయ్య వైయస్ రాజశేఖర రెడ్డి పథకాలను ఏమైనా తీసేశారా అని ఆయన అడిగారు. ఎమ్మార్ ప్రాపర్టీస్ వ్యవహారంపై కేసు నమోదు చేయాలని ఎసిబి కోర్టు ఆదేశించడం హర్షణీయమని ఆయన అన్నారు.

ఎమ్మార్ ప్రాపర్టీస్ పై విచారణ జరిపించాలని తమ పార్టీ బహిష్కృత నేత అంబటి రాంబాబు పదే పదే అడుగుతున్నారని, సిబిఐ విచారణ జరిపించాలనడం ఊతపదమైందని ఆయన అన్నారు. అవసరం అనుకున్నప్పుడు ముఖ్యమంత్రి కె. రోశయ్య మంత్రి వర్గ విస్తరణ చేపడతారని ఆయన అన్నారు. మంత్రి వర్గ విస్తరణ జరగడం లేదనే నిరాశానిస్పృహలు తమకు లేవని ఆయన చెప్పారు. మంత్రి వర్గ విస్తరణ జరిగినా అందరికీ అవకాశం రాదు కదా అని ఆయన అన్నారు. ప్రస్తుతం రోశయ్య మంత్రివర్గమే నడుస్తోందని ఆయన అన్నారు.