సమ్మెతో హైదరాబాద్ - కోల్ కత్తా ఫ్లయిట్ల రద్దు

న్యూఢిల్లీ: కార్మిక సంఘాల సార్వత్రిక సమ్మె ప్రభావం మంగళవారం హైదరాబాదుపై కూడా పడింది. హైదరాబాదులోని అంతర్జాతీయ విమానాశ్రయంలో విమానాల రాకపోకలపై తీవ్ర ప్రభావం పడింది. హైదరాబాద్ నుంచి కోల్ కత్తాకు వెళ్లే విమాన సర్వీసులు మంగళవారం రద్దయ్యాయి. హైదరాబాద్ నుంచి కోల్ కతా వెళ్లాల్సిన ఇండిగో, ఓ కింగ్ ఫిషర్ విమానం రద్దయ్యాయి. హైదరాబాదు రావాల్సిన విమానాలపై అనుమానాలు నెలకొన్నాయి. కోల్ కత్తాలో రవాణా వ్యవస్థ పూర్తిగా స్తంభించింది. దేశవ్యాప్తంగా వంద విమాన సర్వీసులు రద్దయ్యాయి. వామపక్ష కార్మిక సంఘాలు ఇచ్చిన పిలుపు మేరకు సింగరేణిప్రాంతంలో కార్మికులు సమ్మెలో పాల్గొన్నారు. గుర్తింపు పొందిన ఐఎన్‌టీయూసీ సారధ్యంలో కార్మికులు అనేక గనుల్లో విధులను బహిష్కరించారు. దీంతో బొగ్గు ఉత్పత్తి నిలచిపోయింది.

ధరల పెరుగుదల, కార్మికచట్టాల ఉల్లంఘనకు వ్యతిరేకంగా కార్మిక సంఘాలు ఇచ్చిన పిలుపు మేరకు దేశవ్యాప్తంగా సమ్మె కొనసాగుతోంది. దేశంలోని ప్రధాన నగరాలైన ముంబయియ కోల్‌కతా, న్యూఢిల్లీ తదితర నగారాల్లో కార్మికులు, ఉద్యోగులు , బ్యాంకు ఉద్యోగులు విధులను బహిష్కరించారు. వామపక్ష పాలనలో ఉన్న పశ్చిమబెంగాల్‌,కేరళ,త్రిపురల్లో సమ్మె సంపూర్ణంగా కొనసాగుతోంది.