కాంగ్రెసు నేతల మధ్య మీడియానే చిచ్చుపెడుతోంది: డిఎస్

హైదరాబాద్: కాంగ్రెసు నేతల మధ్య మీడియానే చిచ్చుపెడుతుందని ప్రదేశ్ కాంగ్రెసు కమిటీ అధ్యక్షుడు డి.శ్రీనివాస్ అన్నారు. కాంగ్రెసు నేతలు చెపుతున్న విషయాలను మీడియా తన స్వంత భావాలు జోడించి చెప్పటం వలన వివాదాలు రాజుకుంటున్నాయన్నారు. ఎంపీలు కాని, మరే కాంగ్రెసు నేతను కాని మాట్లాడే విషయాలు మా పార్టీ అంతర్గత విషయమని, దీనిపై ఎవరూ ఇష్టం వచ్చినట్లు మాట్లాడటం సరికాదన్నారు. విభేదాలు ఉంటే పరిష్కరిస్తామని అయన విలేకరుల ప్రతినిధుల సమావేశంలో తెలిపారు. ఎంపీల వ్యాఖ్యల వల్ల నష్టం గురించి పార్టీ సమావేశంలో మాట్లాడతామన్నారు.

చిన్న చిన్న విభేదాలు ఉన్నప్పటికి సందర్భం వచ్చినప్పుడు అందరం ఒక్క తాటిపైకి వస్తామని, ఐతే ఎంపీలు, మంత్రుల మధ్య జరుగుతున్న వాద ప్రతివాదనలను తాము సమర్థించటం లేదని తెలియజేశారు. కోసీఆర్ కు అనుకూలంగా మాట్లాడటంపై కూడా పార్టీలో చర్చిస్తామని, పార్టీలోని వారంతా అదుపులోనే ఉందని, అలా ఎవరైనా లేనట్లు కనిపిస్తే వారిని దారిలోకి తీసుకు వస్తామని అన్నారు. మునిసిపల్ ఎన్నికల విషయంలో ప్రభుత్వం వెనక్కు తగ్గలేదని మహిళా వాటా విషయంపై తాత్కాలికంగా ఆగిపోయినట్టు చెప్పారు.