ఎంపీ మధుయాష్కీపై మండిపడ్డ ఎమ్మెల్యే జగ్గారెడ్డి

హైదరాబాద్: నిజామాబాద్ ఎంపీ మధుయాష్కీపై ఎమ్మెల్యే తూర్పు జయప్రకాశ్ రెడ్డి తీవ్రంగా మండిపడ్డారు. మధు యాష్కీ కాంగ్రెసు లో ఉంటూ తెలంగాణ రాష్ట్ర సమితి అధ్యక్షుడు కేసీఆర్ కు వత్తాసు పలుకుతున్నాడని దుయ్యబట్టారు. యాష్కీ చర్యల వలన తెలంగాణలో తెరాస లాభపడుతుందని, యాష్కీ వెంటనే ఇలాంటి చర్యలు మానుకోవాలన్నారు. లేదంటే తెలంగాణ కాంగ్రెసు కార్యకర్తలు బుద్ది చెప్పడానికి సిద్ధంగా ఉన్నారని హెచ్చరించారు.

మధుయాష్కీ ఒక్కడే కాదని తెలంగాణకు చెందిన యాష్కీ, మంద జగన్నాథం, వివేక్ వంటి పలువురు ఎంపీలు కేసీఆర్ ఏజెంట్లుగా ఉంటూ కాంగ్రెసు ను నష్టపరుస్తున్నారన్నారు. తెలంగాణ మంత్రులపై ఎంపీలు మండిపడటాన్ని ఆయన ఖండించారు. తెలంగాణ మంత్రులకు వ్యతిరేకంగా మాట్లాడటానికి వారేమీ రౌడీలు కాదని, అసలు ఎంపీలే పార్టీని భ్రష్టు పట్టిస్తున్నారని దుయ్యబట్టారు.