తెలంగాణ రాష్ట్రంగా ఏర్పడితే వీసాలతో తిరగాలా?: జెసి దివాకర్ రెడ్డి

న్యూఢిల్లీ: తెలంగాణ ప్రత్యేక రాష్ట్రంగా ఏర్పడితే హైదరాబాద్ లో పుట్టిన వారంతా తెలంగాణకు చెందిన వారే అవుతారని జెసి దివాకర్ రెడ్డి ఢిల్లీలో విలేకరుల సమావేశంలో తెలిపారు. ప్రస్తుతం హైదరాబాద్ లో పుట్టిన వారు ఆంధ్రప్రదేశ్ కు చెందిన వారు అవుతారని, అలాగే తెలంగాణ ఏర్పడితే హైదరాబాద్ వారు తెలంగాణ వారే అవుతారన్నారు. విదేశాలలో పుట్టితేనే అక్కడి పౌరసత్వం ఇస్తున్న నేటి రోజుల్లో ఒక దేశంలోని రాష్ట్రంలో వీసాలతో తిరగాలి అనటం ఎంత వరకు సమంజసమని ఆయన ప్రశ్నించారు.

భారత దేశం ప్రజాస్వామ్య దేశమని ఇక్కడ ఎవరైనా, ఎప్పుడైనా, ఎక్కడికైనా వెళ్లి రాజ్యాంగబద్దంగా తమ అభిప్రాయాలు వెలిబుచ్చవచ్చునన్నారు. ఉస్మానియా విశ్వవిద్యాలయ ఐకాస చేస్తున్న వ్యాఖ్యలను దివాకర్ రెడ్డి ఖండించారు. విద్యార్థులు చదువుకొని బాగుపడాలి కాని అనవసర వివాదాలలో ఇరుక్కు పోవద్దని సూచించారు. ముఖ్యమంత్రి రోశయ్య పాలన బాగుందని కితాబు ఇచ్చారు. అధిష్టానం సైతం ఆయన పాలన పట్ల సంతృప్తితో ఉందన్నారు.