కాంగ్రెసులో కెసిఆర్ చిచ్చు: నాయకుల మధ్య తెలంగాణ రగడ

హైదరాబాద్: కాంగ్రెసు విషయంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పకడ్బందీ వ్యూహంతో ముందుకు సాగుతున్నట్లు అనిపిస్తోంది. కాంగ్రెసులో విభేదాలు సృష్టించడం ద్వారా తన బలాన్ని పెంచుకోవడంతో పాటు కాంగ్రెసుపై ఒత్తిడి తేవాలనేది ఆయన వ్యూహంగా కనిపిస్తోంది. తెలంగాణకు సంబంధించి అంశాల్లో కొంత మంది నాయకులకు ముందుకు లాగడం ద్వారా కాంగ్రెసుపై ఒత్తిడి పెంచే వ్యూహాన్ని అనుసరిస్తున్నారు. ఎపిపిఎస్సీ గ్రూప్ వన్ పరీక్ష, న్యాయవ్యవస్థలో తెలంగాణ వాటా అంశాలు ఇందులో భాగమేనని చెప్పవచ్చు. ఈ రెండు వివాదాలు చెలరేగినప్పుడు తెరాస నాయకత్వం వహించేందుకు సిద్ధపడింది. దీంతో తాము వెనకబడిపోతామనే భయంతో కాంగ్రెసు తెలంగాణ పార్లమెంటు సభ్యులు ముందుకు వచ్చారు. తెరాస నాయకుల కన్నా దూకుడుగా వారు వ్యవహరించారు. దీంతో అటు సీమాంధ్ర నాయకులకు, ఇటు తెలంగాణకు చెందిన కొంత మంది మంత్రులకు వారు కంటగింపుగా తయరయ్యారు.

కాంగ్రెసు పార్లమెంటు సభ్యులు మధు యాష్కీ, మందా జగన్నాథం, గుత్తా సుఖేందర్ రెడ్డి, జి వివేక్ లపై రాష్ట్ర మంత్రులు దానం నాగేందర్, ముఖేష్ గౌడ్, దామోదరం రాజనరసింహ తీవ్రంగా మండిపడ్డారు. వారిపై పార్టీ అధిష్టానానికి ఫిర్యాదు చేయాలని మంత్రులు ముఖ్యమంత్రిని కోరారు. మంత్రులపై మధు యాష్కీ తీవ్రంగా మండిపడ్డారు. కాంగ్రెసు సీనియర్ నేత పాల్వాయి గోవర్దన్ రెడ్డి కూడా పార్లమెంటు సభ్యులనే వెనకేసుకొచ్చారు. దానం నాగేందర్, ముఖేష్ కొంత కాలం గ్రేటర్ హైదరాబాద్ రాష్ట్ర డిమాండును ముందుకు తెచ్చారు. పార్లమెంటు సభ్యుడు వైయస్ జగన్ కు అనుకూలంగా కూడా వ్యవహరించారు. అయితే, క్రమంగా వెనక్కి తగ్గుతూ వచ్చారు. కానీ వారు తీవ్రమైన తెలంగాణవాదాన్ని వ్యతిరేకిస్తున్నారు. మొత్తం మీద, కాంగ్రెసులో విభేదాలు పెంచి తెలంగాణకు మెజారిటీ తెలంగాణ నాయకులను అనుకూలంగా మలచాలనే కెసిఆర్ వ్యూహం ఫలిస్తున్నట్లే కనిపిస్తోంది.