సోనియా ఇంటి వద్ద టిడిపి ధర్నా: కెసిఆర్ చిర్రుబుర్రు

హైదరాబాద్/ కరీంనగర్: తెలంగాణ సమస్యలపై చలో ఢిల్లీ కార్యక్రమాన్ని చేపట్టాలని తెలుగుదేశం తెలంగాణ ఫోరం నిర్ణయిచింది. ఈ సందర్భంగా వచ్చే నెల 24వ తేదీన ఢిల్లీ వెళ్లి కాంగ్రెసు అధ్యక్షురాలు సోనియా గాంధీకి వినతిపత్రం సమర్పించాలని ఫోరం నిర్ణయించింది. తెలంగాణపై 25 తేదీన సోనియా ఇంటి ముందు ధర్నా చేయాలని నిర్ణయించినట్లు ఫోరం కన్వీనర్ నాగం జనార్దన్ రెడ్డి సోమవారం మీడియా ప్రతినిధులతో చెప్పారు. దీనిపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చిర్రుబుర్రులాడారు. కలిసి వచ్చే పార్టీలతో చలో ఢిల్లీ కార్యక్రమాన్ని చేపడతామని నాగం చెప్పారు. విద్యార్థులపై కేసులు ఎత్తేయాలని ఆయన డిమాండ్ చేశారు. ప్రాణహిత - చేవెళ్ల ప్రాజెక్టుకు జాతీయ హోదా కల్పించాలని, కాంతపల్లి ప్రాజెక్టులను వెంటనే చేపట్టాలని ఆయన కోరారు. దుమ్ముగూడెం టెయిల్ పాండ్ ప్రాజెక్టును రద్దు చేయాలని కూడా ఆయన డిమాండ్ చేశారు.

కాగా, సోనియా గాంధీ తెలంగాణ ఇచ్చారని, తెలుగుదేశం పార్టీ అధ్యక్షుడు నారా చంద్రబాబు నాయుడే అడ్డుపడ్డారని కెసిఆర్ అన్నారు. కరీంనగర్ సభలో ఆయన తెలుగుదేశం పార్టీపై దుమ్మెత్తిపోశారు. డిసెంబర్ 9వ తేదీన కేంద్ర హోం మంత్రి ప్రకటన చేసిన తర్వాత చంద్రబాబు తెలంగాణకు అడ్డుపడ్డారని ఆయన అన్నారు. తెలంగాణ కోసం సోనియా ఇంటి ముందు కాకుండా చంద్రబాబు ఇంటి ముందు ధర్నా చేయాలని ఆయన అన్నారు. చంద్రబాబు శ్రీకృష్ణ కమిటీకి తెలంగాణకు అనుకూలంగా నివేదిక ఇస్తే తెలంగాణ వెంటనే ఏర్పడుతుందని ఆయన అన్నారు. తెలంగాణ, ఆంధ్ర భార్యాభర్తలు విడాకులు తీసుకున్నట్లుగా ఎప్పుడైనా విడిపోవచ్చునని నెహ్రూయే చెప్పారని ఆయన అన్నారు.

తెలంగాణలో తమ పార్టీని తుడిచిపెట్టడానికి కెసిఆర్ శిఖండిలా వ్యవహరిస్తున్నారని తెలుగుదేశం నాయకుడు టి. దేవేందర్ గౌడ్ విమర్శించారు. తెలంగాణ ఇస్తామని సోనియా గాంధీ కెసిఆర్ చెవిలో చెప్పారా అని ఆయన ఎద్దేవా చేశారు.