టిడిపి తెలంగాణ నేతలపై కెసిఆర్ నిప్పులు: సోనియాకు బాసట

షాద్ నగర్: తెలంగాణపై కాంగ్రెసు అధ్యక్షురాలు సోనియా గాంధీ ఇంటి ముందు ధర్నా చేస్తామని ప్రకటించిన తెలుగుదేశం తెలంగాణ ప్రాంత నాయకులపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నిప్పులు చెరిగారు. కాంగ్రెసు అధ్యక్షురాలు సోనియా గాంధీకి బాసటగా నిలిచారు. మహబూబ్ నగర్ జిల్లా షాద్ నగర్ లో గురువారం జరిగిన బహిరంగ సభలో పలువురు తెలుగుదేశం నాయకులు తెరాసలో చేరారు. ఈ సందర్భంగా కెసిఆర్ మాట్లాడారు. సోనియా గాంధీ చెప్పడం వల్లనే తెలంగాణ రాష్ట్ర ఏర్పాటు ప్రక్రియ ప్రారంభమవుతుందని కేంద్ర హోం మంత్రి పి. చిదంబరం ప్రకటించారని, ఆ రకంగా సోనియా ఇచ్చిన తెలంగాణను తెలుగుదేశం పార్టీ అధ్యక్షుడు నారా చంద్రబాబు నాయుడు అడ్డుకున్నారని, ఇప్పుడు తెలుగుదేశం నాయకులు సోనియా ఇంటి ముందు ఎలా ధర్నా చేస్తారని ఆయన అన్నారు. ప్రపంచంలో ఒక సమస్యపై ఒక్క పార్టీ మూడు నివేదికలు ఇచ్చే సంప్రదాయం ఎక్కడా లేదని ఆయన అన్నారు. ఆ సంప్రదాయాన్ని సృష్టించింది తెలుగుదేశం పార్టీ అధ్యక్షుడు చంద్రబాబు నాయుడేనని ఆయన అన్నారు.

బీమా ప్రాజెక్టుకు 20 టిఎంసిల నీరు కేటాయించాలని ఆయన ప్రభుత్వాన్ని డిమాండ్ చేశారు. తెలంగాణ సాగు నీటి ప్రాజెక్టులకు నీరిచ్చేందుకు ముఖ్యమంత్రి కె. రోశయ్యకు చేతులు రావడం లేదని ఆయన విమర్శించారు. ఈ విషయంపై తెలుగుదేశం నాయకులు ఎందుకు ఆందోళనలు చేయరని ఆయన అడిగారు. తాను చెప్తేనే తెలంగాణ ప్రజలు ఉద్యమంలోకి రాలేదని, తమ సమస్యలున్నాయి కాబట్టే వారే ఉద్యమంలోకి వచ్చారని ఆయన అన్నారు. అయోధ్య తీర్పుపై ఇరు పక్షాల ప్రజలు సంయమనం పాటించాలని ఆయన కోరారు.