ఢిల్లీకి పదో తేదీన రోశయ్య: జగన్ క్యాంప్ మంత్రులకు మూడినట్లే?

హైదరాబాద్: ఎట్టకేలకు ముఖ్యమంత్రి కె. రోశయ్య ఢిల్లీ పర్యటన ఖరారైంది. ఆయన ఈ నెల 10వ తేదీన ఢిల్లీకి వెళ్లనున్నారు. కాంగ్రెసు అధ్యక్షురాలు సోనియా గాంధీ అపాయింట్ మెంటు లభించడంతో ఆయన ఢిల్లీకి వెళ్లాలని నిర్ణయించుకున్నారు. 11వ తేదీ ఉదయం ఆయన సోనియా గాంధీని కలుస్తారు. రాష్ట్ర రాజకీయాలపై, ప్రభుత్వ పనితీరుపై ఆయన సోనియా గాంధీతో చర్చిస్తారు. ప్రదేశ్ కాంగ్రెసు కమిటీ (పిసిసి) తన పరిధిలో కడప పార్లమెంటు సభ్యుడు వైయస్ జగన్ ఓదార్పు యాత్రలో పాల్గొంటున్నవారిపై చర్యలు తీసుకుంటున్న నేపథ్యంలో తన పరిధిలోని నాయకులపై ఏ విధమైన చర్యలు తీసుకోవాలనే అంశంపై రోశయ్య సోనియాతో చర్చించే అవకాశం ఉంది.

మంత్రివర్గ పునర్వ్యస్థీకరణపై ఆయన సోనియాతో మాట్లాడుతారని అంటున్నారు. మంత్రి వర్గ పునర్వ్యస్థీకరణ చాలా కాలంగా వాయిదా పడుతూ వస్తోంది. వైయస్ జగన్ వర్గానికి చెందిన ఇద్దరు మంత్రులకు రోశయ్య ఉద్వాసన చెబుతారనే ప్రచారం జరుగుతోంది. దానిపై రోశయ్య సోనియాతో మాట్లాడే అవకాశం ఉంది. ప్రస్తుతం మంత్రివర్గ పునర్వ్యస్థీకరణ జరిపితే ఎలా ఉంటుందనే అంశంపై చర్చించి, లాభనష్టాలను బేరీజు వేసుకుని ముందుకు సాగవచ్చునని అంటున్నారు. రోశయ్య ప్రధాని డాక్టర్ మన్మోహన్ సింగ్ ను, కేంద్ర మంత్రి ప్రణబ్ ముఖర్జీని, కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలిసే అవకాశం ఉంది.