హైదరాబాదుతోనే యుగాంతమంటూ సీమాంధ్ర మీడియావి కట్టుకథలా?

హైదరాబాద్: హైదరాబాదు నగరం విధ్వంసానికి కాలం ఆసన్నమైందంటూ గత రెండు రోజులుగా సీమాంధ్ర మీడియా వార్తాకథనాలను ప్రసారం చేస్తోంది. పలు టీవీ చానెళ్లు ఒక్కటే వార్తాకథనాన్ని, ఈ మాత్రం తేడా లేకుండా ప్రసారం చేస్తున్నాయి. హైదరాబాదులోని చారిత్రక కట్టడాలు, ఇతర నిర్మాణాలు ఎలా కూలుపోతాయో వివరిస్తూ వీడియో క్లిప్పింగులను చూపిస్తున్నాయి. 400 ఏళ్ల చరిత్ర కలిగిన చార్మినార్ ఎలా నేలమట్టవుతుందో చూపించారు. హైటెక్ సిటీ ఎలా కూలిపోతుందో కూడా వీడియోలో చూపించారు. సృజనాత్మకత పేరిట విపరీతార్థాలు తీస్తూ తెలుగు ప్రైవేట్ చానెళ్లు ఈ వార్తాకథనాన్ని ప్రసారం చేశాయి. హైదరాబాదులోని వనస్థలిపురంలో వరుసగా మూడు రోజులు భారీ శబ్దాలు వినిపించాయంటూ వార్తాకథనాలను ప్రసారం చేసి, దానికి ఈ వార్తాకథనాన్ని లింక్ చేశాయి.

2012లో యుగాంతం జరుగుతుందని, ఆ యుగాంతం హైదరాబాదుతోనే ప్రారంభమవుతుందని వ్యాఖ్యానాలు జోడించాయి. తెలంగాణ రాష్ట్ర ఏర్పడితే ఆ రాష్ట్రానికి హైదరాబాదు గుండె కాయవంటిదని తెలంగాణవాదులు వాదిస్తున్న తరుణంలో హైదరాబాదీలను ఆందోళనకు గురిచేయడానికి ఈ వార్తాకథనాలు ప్రసారం చేస్తున్నట్లు చెబుతున్నారు. హైదరాబాదుపై సీమాంధ్ర మీడియావి కట్టుకథలంటూ రాజ్ న్యూస్ ఓ వార్తాకథనాన్ని ప్రసారం చేసింది. హైదరాబాదు ప్రపంచంలోనే అత్యంత సురక్షిత ప్రాంతమని వ్యాఖ్యానించింది. హైదరాబాదుకు టోర్నడోలు, భూకంపాలు తాకవని చెప్పింది. వేళ ఏళ్ల చరిత్ర కలిగిన హైదరాబాదును వరదలు తప్ప మరోటి ముంచెత్తిన దాఖలాలు ఇప్పటి వరకు లేవనే విషయం అందరికీ తెలిసిందే.