కేంద్ర మంత్రివర్గ విస్తరణ ఉండదన్న మంత్రి దగ్గుబాటి పురంధేశ్వరి

న్యూఢిల్లీ: కేంద్ర మంత్రి వర్గ విస్తరణ ఉండదని ఆంధ్రప్రదేశ్ కు చెందిన కేంద్ర మంత్రి దగ్గుబాటి పురంధేశ్వరి అన్నారు. మంత్రివర్గ విస్తరణ ఉంటుందని తాను భావించడం లేదని చెప్పారు. ఆంధ్రప్రదేశ్ కు చెందిన కాంగ్రెసు నేతలు బుధవారం కాంగ్రెసు అధ్యక్షురాలు సోనియా గాంధీని కలిసి శుభాకాంక్షలు తెలిపారు. ఈ సందర్భంగా ఆమె మీడియా ప్రతినిధులతో మాట్లాడారు. ఈ నెల 9వ తేదీ నుంచి పార్లమెంటు సమావేశాలున్నాయని, తాము సమావేశాల్లో కూర్చోవాల్సి ఉంటుందని, దానికి పెద్దగా గడువు లేదని, అందువల్ల ఈ తక్కువ వ్యవధిలో మంత్రివర్గ విస్తరణ జరుగుతుందని భావించడం లేదని ఆమె అన్నారు.

ఆంధ్రప్రదేశ్ న్యాయం జరుగుతుందని భావిస్తున్నట్లు కాంగ్రెసు పార్లమెంటు సభ్యుడు కావూరి సాంబశివ రావు అన్నారు. కావూరి సాంబశివ రావు కేంద్రంలో మంత్రి పదవిని ఆశిస్తున్నారు. తనకన్నా జూనియర్లకు మంత్రి పదవులు వచ్చాయని ఆయన ఆ మధ్య కాలంలో ఓసారి అన్నారు. కాగా, వి హనుమంతరావు, కె కేశవరావు వంటి పలువురు పార్లమెంటు సభ్యులు కేంద్ర మంత్రివర్గంలో చోటు కోసం ఎదురు చూస్తున్నారు.