చంద్రబాబును అడ్డుకున్న తెలంగాణవాదులు: అరెస్టులు, ఉద్రిక్తత

హైదరాబాద్: తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడి రంగారెడ్డి జిల్లా పర్యటనను తెలంగాణ రాష్ట్ర సమితి కార్యకర్తలు అడుగడుగునా ఆడ్డుకుంటున్నారు. బుధవారం చంద్రబాబనాయుడు జిల్లాలోని బాలానగర్ లో పర్యటించారు. అయితే తెరాస కార్యకర్తలు ఆయనను అడ్డుకోవడానికి ప్రయత్నించారు. తెలంగాణ ద్రోహి చంద్రబాబు గో బ్యాక్, తెలుగు దేశం డౌన్ డౌన్, జై తెలంగాణ అంటూ నినాదాలు చేశారు. వీరిని తెలుగు దేశం పార్టీ కార్యకర్తలు అడ్డుకున్నారు. ఇరువర్గాల మధ్య తోపులాట జరిగి, ఘర్షణ చోటు చేసుకుంది. పరిస్తితి ఉద్రిక్తంగా మారుతుందని గ్రహించిన పోలీసులు వారిని అదుపులోకి తీసుకున్నారు. అంతకుముందు కూకట్ పల్లి జెఎన్టీయు దగ్గర కూడా చంద్రబాబును తెరాస కార్యకర్తలు అడ్డుకున్నారు. దీంతో టీడీపీ వారికి టీఆర్ఎస్ వారికి మధ్య తీవ్ర ఘర్షణ జరిగింది. 15 మంది ఆందోళనకారులను పోలీసులు అరెస్టు చేశారు.

మంగళవారం చంద్రబాబునాయుడి రంగారెడ్డి జిల్లా పర్యటన ప్రారంభమయిన విషయం తెలిసిందే. అయితే ఆయనను ఉప్పల్ కు వెళుతున్న సమయంలో తెరాస కార్యకర్తలు భారీ సంఖ్యలో నాగోల్ వద్ద అడ్డుకున్నారు. పోలీసులు వారిని చెదరగొట్టారు. రంగారెడ్డి జిల్లాలో చంద్రబాబునాయుడు మూడు రోజులు పర్యటిస్తారని ఆ పార్టీ ప్రకటించింది. బుధవారం రెండో రోజుకు ఆయన పర్యటన చేరుకుంది. అయితే అంతటా చంద్రబాబుకు నిరసన వ్యక్తమవటంతో తెలుగు తమ్ముళ్లు నిరుత్సాహ పడుతున్నారు.