భారత్ సాహసం ప్రపంచానికి తెలిసి వచ్చింది: బరాక్ ఒబామా

ముంబై: ముంబై దాడులను భారత్ సమర్థంగా తిప్పికొట్టిందని, దాంతో భారత సాహసం ప్రపంచానికి తెలిసి వచ్చిందని అమెరికా అధ్యక్షుడు బరాక్ ఒబామా అన్నారు. వెంటనే ముంబై సాధారణ స్థితికి రావడాన్ని బట్టి భారత శక్తి ఏమిటో అర్థం చేసుకోవచ్చునని ఆయన అన్నారు. భారత పర్యటనకు వచ్చిన ఒబామా తన సతీమణి మిషెల్లీతో కలిసి ముంబై దాడుల అమరులకు శనివారం నివాళులు అర్పించారు. భారత్ రావడం తనకు ఎంతో గర్వంగా ఉందని, తన పర్యటన అమెరికా భారత్ ల మధ్య సంబంధాలను మరింత మెరుగు పరుస్తుందని ఆశిస్తున్నానని ఆయన అన్నారు. తాజ్ మహల్ హోటల్లో తాను బస చేయడం వల్ల ప్రజలకు విశ్వాసం కలుగుతుందని, తన బస ఉగ్రవాదులకు ఓ హెచ్చరికలాంటిదని ఆయన అన్నారు.

భిన్న మతాలవారు కలిసి జీవిస్తున్న భారతదేశాన్ని నైతికంగా దెబ్బ తీయడానికి ఉగ్రవాదులు ముంబైపై దాడులు చేశారని ఆయన విమర్శించారు. ఉగ్రవాద నిరోధక కార్యక్రమాలను మరింత వేగవంతం చేయాల్సిన అవసరం ఉందని ఆయన అన్నారు. ఉగ్రవాద నిర్మూలన కార్యక్రమంలో తాము భారత్ కు బాసటగా నిలుస్తామని ఆయన అన్నారు. మతప్రాతిపదికగా ప్రజలను విడదీయడానికి ఉగ్రవాదులు ముంబైపై దాడి చేశారని ఆయన అన్నారు. ఒబామా, మిషెల్లీ తాజ్ హోటల్ విజిటర్స్ పుస్తకంలో సంతకాలు చేశారు. భారత ప్రజల శక్తికి తాజ్ హోటల్ నిదర్శనమని ఆయన అన్నారు.