తిరుపతి కాంగ్రెసు ఆఫీసుపై జగన్ వర్గం కాంగ్రెసు నాయకుల దాడి!

తిరుపతి: కడప పార్లమెంటు సభ్యుడు వైయస్ జగన్ వర్గం కాంగ్రెసు నాయకుడు, తిరుపతి పట్టణ అభివృద్ధి సంస్థ(తుడా) మాజీ చైర్మన్ చెవిరెడ్డి భాస్కరరెడ్డిపై కాంగ్రెసు పార్టీ అధిష్టానం చర్యలు తీసుకోవాల్సిందిగా క్రమశిక్షణా సంఘం చెప్పడం పట్ల తిరుపతి చెవిరెడ్డి భాస్కరరెడ్డి కాంగ్రెసు అనుచర కార్యకర్తలు పట్టణంలో జిల్లా కాంగ్రెసు కార్యాలయంపై గురువారం దాడికి పూనుకున్నారు. అయితే దానిని గమనించిన పోలీసులు వెంటనే వారిని అడ్డుకుని అరెస్టు చేశారు.

కాగా బుధవారం చెవిరెడ్డి భాస్కరరెడ్డిపై చర్యలు తీసుకోవాల్సిందిగా కాంగ్రెసు క్రమశిక్షణా సంఘం ప్రదేశ్ కాంగ్రెసు కమిటీ(పిసిసి)కి బుధవారం తెలిపింది. కంతేటి సత్యనారాయణ నేతృత్వంలోని క్రమశిక్షణ కమిటీ రాష్ట్ర కమిటీకి తన నివేదికను అందజేసింది. చెవిరెడ్డి తనకు షోకాజ్ అందిన తర్వాత పార్టీ క్రమశిక్షణా సంఘం ముందు హాజరయి తన వాదనను వినిపించాడు. అయితే చెవిరెడ్డి పార్టీ క్రమశిక్షణకు కట్టుబడి లేడని ఆయనపై క్రమశిక్షణ చర్యలు తీసుకోవచ్చునని తెలిపింది.