ముఖ్యమంత్రి రోశయ్య ధర్నాపై బిజెపి నేత కిషన్ రెడ్డి ఫైర్

హైదరాబాద్: రోశయ్య ప్రభుత్వాన్ని బర్తరఫ్ చేయాలంటూ భారతీయ జనతా పార్టీ రాష్ట్ర అధ్యక్షుడు జి.కిషన్ రెడ్డి ఆధ్వర్యంలో ఆ పార్టీ బృందం సోమవారం రాష్ట్ర గవర్నర్ నరసింహన్ ను కలిసి విజ్ఞప్తి చేసింది. 144వ సెక్షన్ అమలులో ఉన్న ప్రాంతంలో ముఖ్యమంత్రి రోశయ్య, మంత్రులు కలిసి ధర్నా చేయటం రాజ్యాంగ విరుద్ధమన్నారు. ప్రతిపక్ష పార్టీలలాగా ధర్నాకు దిగడమే కాకుండా, నిషిద్ధ ప్రాంతంలో ధర్నా చేసిన రోశయ్యకు ముఖ్యమంత్రిగా కొనసాగే అర్హత లేదని కిషన్ రెడ్డి అన్నారు.

ప్రత్యేక తెలంగాణ రాష్ట్రం కోసం భారతీయ జనతా పార్టీ పోరాడుతుందని కిషన్ రెడ్డి మరోసారి స్పష్టం చేశారు. ఈ శీతాకాలపు సమావేశాల్లోనే తెలంగాణ బిల్లును ప్రవేశపెట్టాలని ఆయన ప్రభుత్వాన్ని డిమాండ్ చేశారు. బిల్లును పార్లమెంటులో ప్రవేశ పెట్టాలని మంగళవారం కరీంనగర్లో బిజెపి సదస్సు నిర్వహిస్తోందన్నారు. భాజపా తెలంగాణ ఉద్యమ కమిటీ ఆధ్వర్యంలో డిసెంబర్ 9న తెలంగాణ కోసం న్యూఢిల్లీలో ధర్నా, సత్యాగ్రహాన్ని నిర్వహించనున్నట్లు కిషన్ రెడ్డి తెలిపారు.