గొడవలు సృష్టిస్తే వెంటనే జగన్ వర్గంపై వేటుకు సిద్ధం?

హైదరాబాద్: కొత్త ముఖ్యమంత్రి ఎన్నిక కోసం హైదరాబాదుకు ఏఐసిసి ప్రతినిదులు ప్రణబ్ ముఖర్జీ, వీరప్ప మొయిలీ, ఎకె ఆంటోనీ, ఆహ్మద్ పటేల్ వచ్చారు. వారు సాయంత్రం 6.15 నిమిషాలలో ప్రత్యేక విమానంలో బేగంపేట విమానాశ్రయంలో దిగారు. ఏఐసిసి ప్రతినిధులకు ఆపద్ధర్మ ముఖ్యమంత్రి కొణిజేటి రోశయ్య, ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ స్వాగతం పలికారు. వారు అక్కడినుండి నేరుగా లేక్ వ్యూ అతిథి గృహానికి చేరుకున్నారు. ఆ తర్వాత సిఎల్పీ సమావేశంలో పాల్గొనడానికి శాసనసభకు చేరుకుంటారు.

కాగా హైదరాబాద్ వస్తున్న ప్రణబ్ ముఖర్జీ బృందానిని నిరసన తెలిపేందుకు జగన్ వర్గం సిద్ధమయింది. వారు జగన్ ను ముఖ్యమంత్రి చేయాలంటూ డిమాండ్ చేయాలనే వ్యూహంతో ఉన్నట్లు తెలుస్తోంది. జగన్ అనుకూలురు అక్కడ ఫ్లకార్డులతో నిరసనలు తెలపడానికి నిలబడి ఉన్నారు. కాగా సిఎల్పీ భేటీలో ఎవరు కూడా ఎలాంటి గొడవ సృష్టించకుండానే క్రమశిక్షణా సంఘం చైర్మన్ ఎకె ఆంటోనీ వచ్చినట్టు సమాచారం.

పార్టీ సమావేసంలో ఎవరైన గొడవను సృష్టించాలని చూస్తే ఆంటోని అక్కడికక్కడే క్రమశిక్షణ చర్యలు తీసుకునే అవకాశముంది. ప్రత్యేకంగా ఆయన అందుకే వస్తున్నట్లు సమాచారం. కాగా శాసనసభ్యుల్లో ఎక్కువమంది జగన్ కే మద్దతు పలుకుతారని జగన్ వర్గానికి చెందిన శాసనసభ్యుడు మేకపాటి చంద్రశేఖరరెడ్డి అంటున్నారు.అవసరమైతే ఢిల్లీ కూడా వెళ్తామని ఆయన అన్నారు. సిఎల్పీ సమావేశానికి శాసనసభ్యులు, ఎమ్మెల్సీలు చేరుకుంటున్నారు.