కిరణ్ కుమార్ రెడ్డి ప్రభుత్వంలోకి చిరంజీవి నో ఎంట్రీ

హైదరాబాద్: ముఖ్యమంత్రి ఎన్ కిరణ్ కుమార్ రెడ్డి ప్రభుత్వంలో చేరకూడదని చిరంజీవి నాయకత్వంలోని ప్రజారాజ్యం పార్టీ నిర్ణయించుకుంది. ఈ విషయంలో వేచి చూసే ధోరణిని అవలంబించాలని అనుకుంటోంది. కాంగ్రెసు ప్రభుత్వంలో చేరే అవకాశాలు ఇప్పట్లో లేవని ప్రజారాజ్యం పార్టీ శాసనసభ్యుడు కన్నబాబు చెప్పారు. భవిష్యత్తు పరిణామాలను బట్టి నిర్ణయం తీసుకుంటామని ఆయన చెప్పారు. పార్టీ శాసనసభ్యులతో, సీనియర్లతో చిరంజీవి సమావేశం ముగిసిన తర్వాత గురువారం ఆయన మీడియా ప్రతినిధులతో మాట్లాడారు. కిరణ్ కుమార్ రెడ్డితో చిరంజీవికి రాజకీయ విభేదాలు లేవని ఆయన చెప్పారు.

తాజా రాజకీయ పరిణామాలను తమ పార్టీ అధ్యయనం చేస్తోందని ఆయన అన్నారు. ప్రస్తుత పరిణామాలను పరిశీలిస్తున్నామని ఆయన చెప్పారు. తమ పార్టీ నిర్మాణాత్మక ప్రతిపక్షంగా వ్యవహరిస్తుందని ఆయన చెప్పారు. పార్టీ వైఖరిపై కార్యకర్తలకు స్పష్టత ఇచ్చేందుకు నాయకులను సంసిద్ధం చేయనున్నట్లు ఆయన తెలిపారు. వచ్చే నెల 4,5,6 తేదీల్లో పార్టీ శిక్షణా శిబిరాలు జరుగుతాయని ఆయన చెప్పారు. ప్రభుత్వ ప్రజా వ్యతిరేక చర్యలను నిరసిస్తామని ఆయన చెప్పారు.