ఉద్యోగుల సమస్యలపై మంత్రుల కమిటీ వేసిన సిఎం కిరణ్

హైదరాబాద్: ముఖ్యమంత్రి ఎన్. కిరణ్ కుమార్ రెడ్డి పెండింగ్ సమస్యలపై దృష్టి సారించారు. ప్రభుత్వ ఉద్యోగుల డిమాండ్లపై నలుగురు మంత్రులతో ఆయన శనివారం ఓ కమిటీని వేశారు. ధర్మాన ప్రసాద రావు, రఘువీరా రెడ్డి, దామోదర రాజనర్సింహ, ఆనం రామనారాయణ రెడ్డి ఈ కమిటీలో ఉంటారు. ఈ కమిటీ రెండు నెలల్లోగా తన నివేదిక సమర్పిస్తుంది. తమ డిమాండ్ల పరిష్కారం కోసం ప్రభుత్వోద్యోగులు ఆందోళన బాట పట్టడానికి సిద్ధమైన విషయం తెలిసిందే.

ముఖ్యమంత్రిగా పదవీ బాధ్యతలు స్వీకరించిన వెంటనే ప్రభుత్వోద్యోగుల ఐక్య కార్యాచరణ కమిటీ నాయకులు కిరణ్ కుమార్ రెడ్డిని కలిశారు. సమస్యలను పరిశీలించడానికి తనకు 15 రోజుల సమయం ఇవ్వాలని ముఖ్యమంత్రి అప్పుడు జెఎసి నాయకులను కోరారు. ఈ మేరకు ఆయన శనివారం మంత్రులతో ఉద్యోగుల సమస్యలపై ఓ కమిటీని వేశారు.