సిఎంపై ఫిర్యాదుకు ఢిల్లీకి బయలుదేరిన వట్టి వసంత్ కుమార్?

హైదరాబాద్: మంత్రి వట్టి వసంతకుమార్ ఏఐసిసి అధ్యక్షురాలు సోనియాగాంధీని కలవడానికి ఆదివారం ఢిల్లీ బయలుదేరి వెళ్ళారు. మంత్రివర్గ కూర్పులో ముఖ్యమంత్రి కిరణ్ కుమార్ రెడ్డి సామాజి న్యాయం పాటించలేదని, ఎమ్మెల్యేల ప్రధాన్యతను, సీనియారిటీని ప్రాతిపదికగా తీసుకొని విస్తరణ చేయలేదని వట్టి సోనియాకు వివరించనున్నారు. అప్పాయింటుమెంటు దొరికితే రేపు ఆయన సోనియాగాంధీని కలిసే అవకాశాలు ఉన్నాయి. తన తాతలనుండి కాంగ్రెస్ నే నమ్ముకొని తమ కుటుంబం ఉంటుందని అయినప్పటికీ తనకు ముఖ్యమంత్రి అప్రధాన పదవి కేటాయించడం వంటి అంశాలను కాంగ్రెస్ అధినేత్రి సోనియా దృష్టికి తీసుకు వెళ్ళేందుకే అయన సిద్దమయ్యారు.

వట్టి ఆదివారం సాయంత్రం సోనియా వ్యక్తిగత కార్యదర్శి అహ్మద్ పటేల్ ను కలవనున్నారు. అహ్మద్ పటేల్ తో కలిసి సోనియాతో అప్పాయింటుమెంటుకోసం అడుగుతారు. అప్పాయింటుమెంటు ఇస్తే రేపు సోనియాను కలిసే అవకాశాలు ఉన్నాయి. రేపు సోనియాతో భేటీ తర్వాత రాష్ట్ర కాంగ్రెస్ వ్యవహారాల ఇంఛార్జ్ వీరప్ప మొయిలీతోనూ భేటీ అవుతారు. మరోపక్క కాంగ్రెస్ ఎమ్మెల్యే కుతూహలమ్మ కూడా ఇవే అంశాలపై అధినేత్రిని కలిసేందుకు రేపు ఢిల్లీ పర్యటనకు బయలు దేరుతున్నారు. తాను ఇప్పటికీ ఐదుసార్లు గెలిచానని, తన వద్ద డబ్బు లేనందున, తాను దళితురాలిని అయినందునే తనకు మంత్రివర్గంలో కిరణ్ కుమార్ రెడ్డి చోటు కల్పించలేదని ఆమె ఆవేదన చెందారు.