వైఎస్ జగన్ రాజీనామా కాంగ్రెస్ కు దెబ్బ: వెంకయ్యనాయుడు

హైదరాబాద్: వైఎస్ జగన్మోహన్ రెడ్డి రాజీనామా చేయటం కాంగ్రెస్ పార్టీకి పెద్ద దెబ్బ అని భారతీయ జనతా పార్టీ సీనియర్ నాయకులు వెంకయ్యనాయుడు ఆదివారం అన్నారు. వైఎస్ జగన్ తో తాను మాట్లాడలేదని చెప్పారు. దేశం ఆర్థికంగా ఉండటం మాత్రమే కాదని, ప్రజలంతా ఆరోగ్యంగా ఉంటేనే దేశం అభివృద్ధి చెందుతుందని ఆయన అన్నారు. ప్రజల ఆరోగ్యం ప్రభుత్వం బాధ్యత అన్నారు. ప్రభుత్వానికి వచ్చే ఆదాయంలో 25శాతం ఆరోగ్యానికి కేటాయించాలని అన్నారు. ఎస్సీ వర్గీకరణలో ముఖ్యమంత్రి కిరణ్ కుమార్ రెడ్డి జోక్యం చేసుకోవాలని సూచించారు.

2జి స్పెక్ట్రంపై తాను సంయుక్త పార్లమెంటరీ విచారణ(జెపిసి)కి మాత్రమే అంగీకరిస్తామన్నారు. అంతే తప్ప మరే విచారణకు అంగీకరించమన్నారు. 2జి స్పెక్ర్టంలో రాజా చేసిన కుంభకోణం దేశంలోనే అతిపెద్దదని చెప్పారు. భావసారుప్యంగల పార్టీలు తమతో కలిసి వస్తే వారితో కలిసి కేంద్రం అవినీతిపై పోరాడటానికి భారతీయ జనతా పార్టీ సిద్ధంగా ఉందన్నారు. ప్రజా సమస్యలు, అవినీతిపై పోరాటానికి తమ పార్టీ ఎప్పుడు ముందుంటుందన్నారు.