వైయస్ జగన్ ఓపిక పట్టి కాంగ్రెసులోనే ఉండాల్సింది: రేణుకా చౌదరి

హైదరాబాద్‌: ఓపిక పట్టి వైయస్ జగన్ కాంగ్రెసులోనే ఉండాల్సిందని, కాంగ్రెసులో ఉంటే వైయస్ జగన్ కు మంచి స్థానం లభించి ఉండేదని కాంగ్రెసు నాయకురాలు, మాజీ మంత్రి రేణుకా చౌదరి అన్నారు. కాంగ్రెసు కుటుంబం లాంటిదని, ఎవరైనా వెళ్లిపోయి సొంత పార్టీ పెట్టుకోవచ్చునని ఆమె గురువారం మీడియా ప్రతినిధులతో అన్నారు. ప్రజాస్వామ్యంలో సొంత పార్టీ పెట్టుకునే హక్కు ప్రతి ఒక్కరికీ ఉందని, జగన్ కు కూడా ఆ హక్కు ఉంటుందని ఆమె అన్నారు. అనుభవరాహిత్యం వల్లనే వైయస్ జగన్ అలా మాట్లాడుతున్నారని ఆమె అన్నారు. వైయస్సార్ కుటుంబానికి సోనియా గాంధీ ఎనలేని ప్రాముఖ్యం ఇచ్చారని, వైయస్సార్ సతీమణి వైయస్ విజయలక్ష్మి సోనియాను కలిసిన విషయం అందరికీ తెలిసిందేనని ఆమె అన్నారు.

కాంగ్రెసు గుర్తు మీదనే వైయస్సార్ గెలిచారని, కాంగ్రెసు వల్లనే వైయస్సార్ ఆ స్థాయికి ఎదిగి ప్రజాదరణ పొందారని ఆమె అన్నారు. కొంత మంది వ్యక్తులు వెళ్లిపోయినంత మాత్రాన కాంగ్రెసుకు జరిగే నష్టమేమీ లేదని ఆమె అన్నారు. తెలుగువారి ఆత్మగౌరవం ఎవరి పేటెంటో, హక్కో కాదని, అది అందరిదని ఆమె అన్నారు. ఆంధ్రప్రదేశ్ కు చెందిన ప్రతి ఒక్కరూ వైయస్సార్ ప్రతినిధులేనని ఆమె అన్నారు.