జగన్ పార్టీలో చేరను! కాంగ్రెసు ను వీడను:రాయపాటి సాంబశివరావు

గుంటూరు: తాను మాజీ పార్లమెంటు సభ్యుడు వైయస్ జగన్మోహన్ రెడ్డి పార్టీలోగానీ, తెలుగుదేశం పార్టీలోగాని చేరుతున్నట్లు వస్తున్న వార్తలను గుంటూరు పార్లమెంటు సభ్యుడు రాయపాటి సాంబశివరావు మంగళవారం తోసిపుచ్చారు. తాను ఏ పార్టీలోనూ చేరనని, రాజకీయాల్లో ఉండాలనుకుంటే కాంగ్రెసు లోనే ఉంటానన్నారు. రాజకీయంగా తనను ఇంత ఎత్తుకు తీసుకు వచ్చిన పార్టీని విడిచి పోయే సమస్యే లేదన్నారు. వేరే పార్టీలో చేరుతున్నట్టు మీడియాలో వస్తున్న వార్తలు అబద్దమన్నారు. రాజకీయాలనుండి తప్పుకోవాలనుకుంటే ఇంట్లోనే కూర్చుంటాను, రాజకీయాల్లో ఉండాలనుకుంటే కాంగ్రెసు లోనే ఉంటానని చెప్పారు.

జగన్, తెలుగుదేశం పార్టీ అధ్యక్షుడు చంద్రబాబునాయుడికి, ముఖ్యమంత్రి కిరణ్ కుమార్ రెడ్డికి తాను పెళ్లి కార్డులు మాత్రమే ఇవ్వడానికి వెళ్లానని చెప్పారు.నేనెప్పుడూ పదవులు ఆశించలేదన్నారు. కాంగ్రెసు వల్లే నాకు గుర్తింపు వచ్చిందన్నారు. అయితే పార్టీలో మన రాష్ట్రానికి చెందిన పార్లమెంటు సభ్యులకు మంత్రి పదవులు లేక పోవటం వల్ల ప్రజలకు సరైన న్యాయం చేయలేక పోతున్నారన్నారు. నేను కూడా ప్రజలకు తగిన న్యాయం చేయలేకనే రాజకీయాల్లోనుండి తప్పుకుంటానని ప్రకటించినట్టు చెప్పారు.

జైపాల్ రెడ్డి మినహా ఎవరికీ మంత్రి పదవులు లేవన్నారు. ఇతర రాష్ట్రాలలో ఆయా పార్టీల వారి అవసరం దృష్ట్యా మనం పదవులు కోల్పోతున్నామన్నారు. అందుకే ప్రజలు ఒకే పార్టీని గెలిపించడమే మంచి పరిష్కారమని ఆయన అభిప్రాయపడ్డారు. కాంగ్రెసు లో కోట్ల రూపాయలను తన కుటుంబం నష్టపోయిందన్నారు. అందరు కలిసి రైతు సమస్యలపై పోరాడుతున్నప్పుడు జగన్ దీక్ష చేయాల్సిన అవసరం లేదని ఆయన అన్నారు. ముఖ్యమంత్రి కిరణ్ రైతు పక్షపాతి అని, ఆయనకు అన్నీ తెలుసునన్నారు. కిరణ్ కొత్తగా వచ్చినందు కొంత సమయం తీసుకుంటుందన్నారు.