మూడేళ్ల తర్వాత అధికారం, ముప్పై ఏళ్లు పాలిస్తా: వైయస్ జగన్

కడప: తనతో ఉండేవాళ్లకు మూడేళ్లు మాత్రమే కష్టాలుంటాయని, మూడేళ్ల తర్వాత అధికారం తమదేనని మాజీ పార్లమెంటు సభ్యుడు వైయస్ జగన్ చెప్పారు. తాను 30 ఏళ్లు రాష్ట్రాన్ని పాలిస్తానని, వందేళ్లు వైయస్సార్ పేరు ప్రజల మదిలో నిలబడేలా చేస్తానని ఆయన అన్నారు. కడప నగర కార్యకర్తలను ఉద్దేశించి ఆయన శనివారం మాట్లాడారు. పులివెందుల, కడపలో మన పార్టీ పేరు మీదనే, పార్టీ జెండా మీదనే పోటీ చేస్తామని ఆయన మరోసారి చెప్పారు. తనను తొక్కేయడానికి తన కడప పార్లమెంటు నియోజకవర్గం నుంచే ముగ్గురికి మంత్రి పదవులు ఇచ్చారని, ఎన్నికల సమయంలో నియోజకవర్గానికి ఓ మంత్రిని పెట్టవచ్చునని ఆయన అన్నారు.

కాంగ్రెసు అధ్యక్షురాలు సోనియా గాంధీపై ఆయన అవే విమర్శలు చేశారు. తన కుటుంబాన్ని స్వార్థ రాజకీయాల కోసం చీల్చారని ఆయన విమర్శించారు. తాను ఏ విధంగా మనస్తాపం చెందింది, ఎందుకు పార్టీ నుంచి బయటకు వచ్చింది ఆయన వివరించారు. సోనియా గాంధీ తన కుటుంబాన్ని చీల్చడానికి కూడా వెనకాడలేదని, దాంతో తాను తీవ్ర మనస్తాపానికి గురయ్యానని ఆయన చెప్పారు. వైయస్సార్ మరణించిన నాటి నుంచి జరిగిన పరిణామాలను ఆయన మరోసారి వివరించారు. తన వర్గం వారిని అణచేయడానికి కాంగ్రెసు అధిష్టానం ప్రయత్నిస్తోందని ఆయన విమర్శించారు.