అధికారంలో ఉన్నప్పుడు బాబు ప్రపంచ బ్యాంకు తొత్తు: షబ్బీర్ అలీ

న్యూఢిల్లీ: తెలుగుదేశం పార్టీ అధ్యక్షుడు చంద్రబాబు నాయుడు తాను ముఖ్యమంత్రిగా ఉన్న సమయంలో ప్రపంచ బ్యాంకు తొత్తుగా వ్యవహరించారని మాజీ మంత్రి షబ్బీర్ అలీ సోమవారం న్యూఢిల్లీలో ఆరోపించారు. షబ్బీర్ అలీ ప్లీనరీ సమావేశంలో ఉన్నారు. చంద్రబాబు నాయుడు తాను అధికారంలో ఉన్నప్పుడు రైతులకోసం ఏం చేశారో అందరికీ తెలుసునన్నారు. వ్యవసాయం దండుగ అన్న చంద్రబాబు రైతుల కోసం దీక్ష అనటం హాస్యాస్పదమన్నారు.

తన హయాంలో విద్యుత్ ఛార్జీలు తగ్గించమన్న రైతులపై చంద్రబాబు నిర్ధాక్షిణ్యంగా పోలీసులతో కాల్పులు జరిపించారన్నారు. ఆ దుర్ఘటనలో పలువురు రైతులు ప్రాణాలు కోల్పోయిన విషయం అందరికీ తెలిసిందేనన్నారు. వడ్డీల పేరుతో తెలుగుదేశం రైతుల నడ్డి విరిస్తే వాటిని ముఖ్యమంత్రి కిరణ్ కుమార్ రెడ్డి ప్రభుత్వం తొలగించిందన్నారు. రైతులపై పెట్టిన కేసులను కూడా తొలగించిన ఘనత కాంగ్రెసు ప్రభుత్వానిదేనన్నారు.