ఉద్యమాన్ని హింసవైపు మళ్లించే కుట్ర: ప్రభుత్వంపై ఈటెల ధ్వజం

హైదరాబాద్: కిరణ్ కుమార్ రెడ్డి ప్రభుత్వం తెలంగాణ ఉద్యామాన్ని అణిచివేయాలని చూస్తుందని తెలంగాణ రాష్ట్ర సమితి శాసనసభపతి ఈటెల రాజేందర్ సోమవారం విలేకరుల సమావేశంలో అన్నారు. తెలంగాణ కోసం శాంతియుతంగా ఉద్యమాలు చేపట్టాలనుకున్న విద్యార్థులను హింసవైపు మళ్లించే కుట్రను కాంగ్రెసు ప్రభుత్వం చేస్తుందన్నారు. ప్రభుత్వం కుట్రలో మేం పావులం కాబోమని చెప్పారు.

ప్రభుత్వం శాసనసభలో అందరి సాక్షిగా విద్యార్థులపై కేసులు ఎత్తివేస్తానని చెప్పి ఇంతవరకు ఎత్తివేయలేదన్నారు. కేసులు ఎత్తివేస్తానని చెప్పిన ప్రభుత్వం తన హామీని తర్వాత తుంగలో తొక్కిందన్నారు. రాష్ట్రంలో పరిస్థితులు చూస్తుంటే రాజరిక పాలన నడుస్తోందా అనే అనుమానాలు కలుగుతున్నాయన్నారు. ప్రభుత్వం విద్యార్థులపై పెట్టిన కేసులను వెంటనే ఎత్తివేయకపోతే తెరాస ఆధ్వర్యంలో ఆందోళనలు నిర్వహిస్తామన్నారు.