వైయస్ జగన్ వల్ల కాంగ్రెసు తుడిచిపెట్టుకు పోతుంది: రోజా

విజయవాడ: వైయస్ జగన్ పార్టీతో కాంగ్రెసు, తెలుగుదేశం పార్టీలు తుడిచిపెట్టుకు పోతాయని సినీ నటి, రాజకీయ నాయకురాలు రోజా అన్నారు. కాంగ్రెసు పార్టీకి ప్రజలే బుద్ధి చెప్తారని ఆమె అన్నారు. వైయస్ జగన్ దీక్షా ప్రాంగణం వేదిక నుంచి ఆమె మాట్లాడారు. దేశంలో ఏ రాష్ట్రంలో కూడా ప్రకటించని ప్యాకేజీ రైతులకు ఇచ్చామని ముఖ్యమంత్రి కిరణ్ కుమార్ రెడ్డి గొప్పలు చెప్పుకుంటున్నారని ఆమె విమర్శించారు. 2జి స్పెక్ట్రమ్ వంటి కుంభకోణాలతో వేలాది కోట్ల రూపాయలు దండుకుంటున్న కాంగ్రెసు పెద్దలు రైతులకు సహాయం చేయడానికి ముందుకు రావడం లేదని ఆమె అన్నారు.

వైయస్ జగన్ దీక్ష ప్రకంపనలు ఢిల్లీలో వినిపిస్తున్నాయని ఆమె వ్యాఖ్యానించారు. రైతులకు ఏ విధమైన న్యాయం జరిగినా ఆ క్రెడిట్ వైయస్ జగన్ కే దక్కుతుందని ఆమె అన్నారు. వైయస్ జగన్ చేపట్టిన తొలి పోరాటం రైతుల కోసమే కావడం యాదృచ్ఛికమే అయినా వైయస్సార్ రైతుల కోసం చేసిన మేలు మరువలేనిదని ఆమె అన్నారు. రైతుల కోసం వైయస్సార్ ఎన్నో చేశారని ఆమె చెప్పారు.