వైయస్ వివేకానంద రెడ్డిని ప్రశ్నించిన అంబటి, డిఎల్ పై నిప్పులు

గుంటూరు‌: దివంగత నేత వైయస్ రాజశేఖర రెడ్డిపై వైద్య శాఖ మంత్రి డిఎల్ రవీంద్రారెడ్డి చేసిన వ్యాఖ్యలపై మాజీ పార్లమెంటు సభ్యుడు వైయస్ జగన్ కు వర్గానికి చెందిన నాయకుడు అంబటి రాంబాబు వ్యవసాయ శాఖ మంత్రి వైయస్ వివేకానంద రెడ్డిని ప్రశ్నించారు. వైయస్ పై డిఎల్ రవీంద్రా రెడ్డి తీవ్ర వ్యాఖ్యలు చేస్తే ఎందుకు స్పందించడం లేదని ఆయన వైయస్ వివేకానంద రెడ్డిని అడిగారు. డిఎల్ రవీంద్రా రెడ్డిపై ఆయన శుక్రవారం మీడియా ప్రతినిధుల సమావేశంలో నిప్పులు చెరిగారు. వైయస్సార్ ను, వైయస్సార్ కుటుంబాన్ని విమర్శించే నీచస్థాయికి రవీంద్రారెడ్డి దిగజారారని ఆయన వ్యాఖ్యానించారు. వైయస్ పై విమర్శలు చేసే స్థాయి రవీంద్రా రెడ్డికి లేదని ఆయన అన్నారు. వైయస్ బతికి ఉన్నంత వరకు నోరు మెదపని రవీంద్రా రెడ్డి, చనిపోయాడు కాబట్టి సమాధానం ఇవ్వలేరని విమర్శలు చేస్తున్నారని ఆయన అన్నారు.

రవీంద్రా రెడ్డి అవాకులు చెవాకులను ప్రజలు గమనిస్తున్నారని ఆయన అన్నారు. తెలుగుదేశం పార్టీ అధ్యక్షుడు చంద్రబాబుతో డిఎల్ రవీంద్రా రెడ్డి లోపాయికారీ ఒప్పందాన్ని కుదుర్చుకున్నారని ఆయన ఆరోపించారు. ఎమ్మార్ ప్రాపర్టీస్ పై పోరాడుతానని చెప్పిన రవీంద్రా రెడ్డి మంత్రి వర్గంలో చేరి విలువలకు తిలోదకాలిచ్చారని ఆయన అన్నారు. అధికారం వచ్చేసరికి రవీంద్రా రెడ్డికి మదం పెరిగిందని ఆయన అన్నారు. కన్నుమిన్ను కానక రవీంద్రా రెడ్డి మాట్లాడుతున్నారని ఆయన అన్నారు. రాయలసీమ పౌరషం ఉంటే శ్రీకాంత్ రెడ్డి చేసిన సవాల్ ను స్వీకరించి రాజీనామా చేసి తిరిగి పోటీ చేయాలని ఆయన రవీంద్రా రెడ్డిని డిమాండ్ చేశారు.

ఎఐసిసికి సిగ్గు లేదని ఆయన వ్యాఖ్యానించారు. వైయస్ మరణానికి దిగ్భ్రాంతికి గురై మరణించినవారి కుటుంబాలకు లక్ష రూపాయలేసి నష్టపరిహారం ఇస్తామని ప్రకటించిన కాంగ్రెసు అధిష్టానం ఇప్పటి వరకు ఇవ్వలేకపోయిందని, ఎఐసిసికి సిగ్గు లేదని ఆయన అన్నారు. అన్ని జిల్లాల్లో యంత్రాంగం ఉన్న కాంగ్రెసు నష్టపరిహారం ఇవ్వలేకపోయిందా అని ఆయన అడిగారు. తమది రైతుల ప్రభుత్వమని ఈ ప్రభుత్వం నమ్మకం కలిగించలేకపోయిందని ఆయన అన్నారు. వైయస్ జగన్ కు పోటీగా చంద్రబాబు కార్యక్రమాలు చేపడుతున్నారని ఆయన విమర్శించారు.