గుంటూరులో శంకర్ దాదా అవతారమెత్తిన పీఆర్పీ అధ్యక్షుడు చిరంజీవి

గుంటూరు: ప్రజారాజ్యం వ్యవస్థాపక అధ్యక్షుడు చిరంజీవి మళ్లీ శంకర్ దాదా ఎంబీబీఎస్ అవతారమెత్తాడు. అయితే ఈసారి సినిమాల్లో కాకుండా రియల్ గానే శంకర్ దాదా అవతారం ఎత్తాడు. గుంటూరులో పంట నష్టపోయి మరణించిన రైతు కుటుంబాలను ఆయన పరామర్శిస్తున్నారు. ప్రజారాజ్యం తరఫున ఆయన వారికి కొంత ఆర్థిక సహాయాన్ని కూడా అందిస్తున్నారు. ఆయన పరామర్శ పర్యటనలో పెరాలసిస్ తో బాధపడుతున్న ఓ యువకుడిని పరామర్శించాడు.

శంకర్ దాదా చిత్రంలో వైద్యంతో కన్నా ప్రేమతోనే రోగాన్ని నయం చేయవచ్చని చెప్పిన చిరంజీవి తన నిజ జీవితంలో కూడా ఆ యువకుడిపై అదే ప్రయోగం చేశారు. పెరాలసిస్ తో బాధపడుతున్న యువకుడిని మాట్లాడించడానికి తెగ ప్రయత్నాలు చేశారు. యువకుడి పక్కనే కూర్చుని కళ్లు ఆర్పమని, శ్వాస పీల్చుకోమని చెప్పాడు. నా మాటలు నీకు అర్థం అవుతున్నాయా అంటూ ప్రశ్నించారు. నీకోసమే వచ్చానన్నాడు. ఆ యువకుడు కూడా చిరంజీవి చెప్పినట్లుగా చేశాడు. సినిమాలలో ప్రేమతో ఆరోగ్యాన్ని బాగు చేయవచ్చునని చెప్పిన చిరంజీవి నిజజీవితంలో కూడా దానిని చేయడం విశేషం.