రాడియా లింక్: మాజీ సిజెఐ కెజి బాలకృష్ణన్ కు మరిన్ని చిక్కులు

కొచ్చి: కార్పొరేట్ లాబీయిస్టు నీరా రాడియాతో తన కుటుంబానికి సంబంధాలున్నాయనే వార్తలు రావడంతో సుప్రీంకోర్టు మాజీ ప్రధాన న్యాయమూర్తి కెజి బాలకృష్ణన్ మరింతగా చిక్కుల్లో పడ్డారు. 2జి స్పెక్ట్రమ్ కుంభకోణంలో నీరా రాడియా పేరు ముందుకు వచ్చిన విషయం తెలిసిందే. ఉప రాష్ట్రపతి కార్యాలయానికి 2010 మే 4వ తేదీన ఢిల్లీకి చెందిన జర్నలిస్టు డాక్టర్ ఎం. ఫుర్కౌన్ చేసిన ఫిర్యాదుతో వివాదాస్పద కార్పొరేట్ సంబంధాలు బయటకు వచ్చాయి. కృష్ణా గోదావరి బేసిన్ గ్యాస్ సరఫరాపై ముఖేష్ అంబానీకి చెందిన రిలయన్స్ ఇండస్ట్రీస్ లిమిటెడ్, అనిల్ అంబానీకి చెందిన రిలయన్స్ నేచురల్ రిసోర్సెస్ లిమిటెడ్ వివాదాన్ని పరిష్కరించాలని బాలకృష్ణన్ కుమారుడు ప్రదీప్ ఎన్నారై వాణిజ్యవేత్త యూసుఫ్ అలీని కోరినట్లు ఆరోపణలు వచ్చాయి.

సుప్రీంకోర్టులో న్యాయవాదిగా పనిచేస్తున్న ప్రదీప్ దుబాయ్ ఏడు సార్లు వెళ్లినట్లు, ఎన్నారై వాణిజ్యవేత్తతో సంప్రదింపులు జరిపినట్లు ఆ జర్నలిస్టు ఆరోపించారు. ఆర్ఐఎల్ కు అనుకూలంగా సుప్రీంకోర్టు 2010 మే 7వ తేదీన తీర్పు ఇవ్వడంతో అంబానీ సోదరుల మధ్య గల మూడున్నరేళ్ల వివాదం ముగిసింది. నీరా రాడియా సంభాషణల టేపుల్లో ఈ విషయం కూడా ఉంది. ఎస్ఎన్సి - లావలీన్ కేసులో సిపిఎం నాయకుడు పినరయ్ విజయన్ కు ఊరట కలిగించడంలో బాలకృష్ణన్ ప్రధాన పాత్ర పోషించారనే ఆరోపణలు కూడా ఉన్నాయి. ఢిల్లీ జర్నలిస్టు ఆరోపణల్లో ఆ వివరాలు కూడా ఉన్నాయి.