హైదరాబాద్ రాజధానిగా తెలంగాణ: ఉత్తమ్‌ కుమార్‌ రెడ్డి

న్యూఢిల్లీ: హైదరాబాద్ రాజధానిగా ప్రత్యేక తెలంగాణ ఏర్పాటు అవుతుందని తాను భావిస్తున్నట్టు కాంగ్రెస్ సీనియర్ నాయకుడు ఉత్తమ్‌ కుమార్‌ రెడ్డి బుధవారం న్యూఢిల్లీలో విలేకరులతో అన్నారు. హోంమంత్రి చిదంబరం గురువారం ఏర్పాటు చేసిన సమావేశంలో కేవలం నివేదికలే ఇస్తారని చెప్పారు. ఆ సమయంలో పార్టీలు తమ అభిప్రాయాలు చెప్పవలసిన అవసరం లేదన్నారు. నివేదికలు ఇచ్చిన తర్వాత కొన్ని రోజులకు మళ్లీ పార్టీలను అభిప్రాయాలు అడిగే అవకాశముందన్నారు.

కాగా అంతకుముందు కాంగ్రెస్ సీనియర్ నాయకుడు ప్రణబ్ ముఖర్జీతో కాంగ్రెస్ ఆంధ్రప్రదేశ్ వ్యవహారాల ఇంఛార్జ్ వీరప్ప మొయిలీ, అఖిలపక్షానికి కాంగ్రెస్ పార్టీ తరఫున వెళ్లిన తెలంగాణకు చెందిన ఉత్తమ్‌కుమార్‌రెడ్డి, సీమాంధ్రకు చెందిన కావూరి సాంబశివరావు భేటీ ఆయ్యారు. ఆ భేటీలో గురువారం చిదంబరం నిర్వహించే అఖిలపక్షంలో ఏం చేయాలనే విషయాన్ని వారు చర్చించినట్టుగా తెలుస్తోంది. రాష్ట్రంనుండి ఏయే పార్టీలు రావటం లేదు, ఎందుకు రావటం లేదనే విషయాన్ని కూడా వారు చర్చించినట్టు తెలుస్తోంది.