కెసిఆర్ సేఫ్: కష్టాలు తెలంగాణ కాంగ్రెసు నాయకులకే

హైదరాబాద్: శ్రీకృష్ణ కమిటీ నివేదిక వల్ల కాంగ్రెసు తెలంగాణ నాయకులు మరిన్ని కష్టాల్లో పడ్డారు. శ్రీకృష్ణ కమిటీ తెలంగాణకు అనుకూలంగా నివేదిక ఇస్తుందని, తెలంగాణ రాష్ట్ర ఏర్పాటు కోసమే శ్రీకృష్ణ కమిటీని వేశారని చెబుతూ ఏడాది పాటు కాలం గడిపిన కాంగ్రెసు తెలంగాణ నేతలు ఇరకాటంలో పడ్డారు. శ్రీకృష్ణ కమిటీ ప్రథమ ప్రాధాన్యాన్ని సమైక్యాంధ్రకే ఇవ్వడం వారిని ఇబ్బందుల్లో పడేసింది. పైగా, శ్రీకృష్ణ కమిటీ సమస్యకు గానీ, ఇరు ప్రాంతాల మధ్య సామరస్యవూర్వక వాతావరణ ఏర్పడడానికి గానీ ఏ విధమైన సూచనా చేయలేదు. దీంతో కాంగ్రెసు తెలంగాణ ప్రాంత నాయకులపైనే భారమంతా పడింది. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఇప్పుడు సేఫ్ జోన్‌లో ఉన్నారు.

శ్రీకృష్ణ కమిటీ నివేదిక వెలువడే వరకు ఆత్మరక్షణలో పడిన తెలుగుదేశం తెలంగాణ ప్రాంత నాయకులు కూడా కాస్తా సేఫ్‌గానే బయట పడ్డారు. ఇప్పుడు బాణాలన్నీ కాంగ్రెసుపై ఎక్కుపెట్టడానికి వారికి అవకాశం చిక్కింది. తెలంగాణ ఇచ్చేది, తెచ్చేది తామేనంటూ తెలంగాణ ప్రాంత కాంగ్రెసు నాయకులు ప్రకటిస్తూ వచ్చారు. దానికి విరుద్ధంగా శ్రీకృష్ణ కమిటీ నివేదిక ఉంది. తెలంగాణ ప్రాంత కాంగ్రెసు ప్రజాప్రతినిధులు తమ తమ నియోజకవర్గాల్లో అడుగు పెట్టని పరిస్థితి ఉంది. దీంతో వారు ఏదో ఒక తీవ్రమైన నిర్ణయం తీసుకునే పరిస్థితిలో పడ్డారు. తెలంగాణ రాష్ట్ర ఏర్పాటు ప్రక్రియకు కట్టుబడి ఉండాలని తెలంగాణ ప్రాంత ప్రజాప్రతినిధులు పట్టుబట్టడం తప్ప మరో మార్గం వారికి లేదు.