రాజీనామా చేయడమే కాదు, ఆమరణ దీక్షకూ దిగుతా: జూపల్లి కృష్ణారావు

హైదరాబాద్: తెలంగాణ రాష్ట్ర ఏర్పాటు డిమాండ్‌పై తెలంగాణ ప్రాంతానికి చెందిన రాష్ట్ర మంత్రి జూపల్లి కృష్ణారావు తీవ్రంగా స్పందించారు. శుక్రవారం జరిగిన తెలంగాణ ప్రాంత ప్రజాప్రతినిధుల సమావేశంలో పాల్గొన్న ఆయన తెలంగాణ రాష్ట్రం ఇవ్వకుంటే రాజీనామా చేస్తానని ప్రకటించారు. పార్లమెంటు సమావేశాల తొలి రోజు తెలంగాణ బిల్లును ప్రతిపాదించకపోతే మంత్రి పదవికి, శాసనసభా సభ్యత్వానికి రాజీనామా చేస్తానని ఆయన చెప్పారు.

తెలంగాణ కోసం అవసరమైతే ఆమరణ నిరాహార దీక్ష కూడా చేస్తానని ఆయన చెప్పారు. తెలంగాణ ప్రాంత ప్రజాప్రతినిధుల సమావేశానికి మంత్రులు కె. జానారెడ్డి, బసవరాజు సారయ్య, జూపల్లి కృష్ణారావు హాజరయ్యారు. తెలంగాణ రాష్ట్రం ఇవ్వకపోతే పదవులకు రాజీనామా చేయాలని సమావేశంలో నిర్ణయించారు. అనంతరం తెలంగాణ ప్రాంత ప్రజాప్రతినిధులు ముఖ్యమంత్రి కిరణ్ కుమార్ రెడ్డిని కలిశారు. ఉస్మానియా విశ్వవిద్యాలయంలోని బలగాలను, తెలంగాణలోని కేంద్ర బలగాలను ఉపసంహరించాలని వారు కోరారు.