మద్దెలచెర్వు సూరి హత్యకు కారణాలేమిటి?: సాక్షి టీవీ చానెల్ రిపోర్ట్

హైదరాబాద్: మద్దెలచెర్వు సూరి హత్యకు గల కారణాలపై మాజీ పార్లమెంటు సభ్యుడు వైయస్ జగన్‌కు చెందిన సాక్షి టీవీ చానెల్ ఓ ప్రత్యేకమైన వార్తాకథనాన్ని ప్రసారం చేసింది. సూరి హత్యకు గల కారణాలపై వివిధ కోణాల్లో పోలీసులు దర్యాప్తు చేస్తున్నారంటూ కొన్ని కోణాలను సాక్షి టీవీ చానెల్ వివరించింది. ఓ మంత్రి కుమారుడి హస్తం సూరి హత్య వెనక ఉండవచ్చుననేది అందులో ఓ కోణం. కాగా, విజయవాడలో సుభాష్ చంద్రబోస్ అనే పారిశ్రామికవేత్త ఆస్తి తగాదాల్లో వచ్చిన పొందిన వాటాలో తేడాలొచ్చాయని, ఆ ఆస్తి తగాదాను పరిష్కరించినందుకు 40 కోట్ల రూపాయలు దక్కాయని, వాటిని పంచుకోవడంలో తేడాలొచ్చాయని, ఇది సూరి హత్యకు ఒక్క కారణమై ఉండవచ్చునని సాక్షి వ్యాఖ్యానించింది. విజయవాడలో భాను కిరణ్ సూరికి తెలియకుండా దందాలు ప్రారంభించాడని, ఇది తెలుస్తుందనే భయంతో భాను సూరిని మట్టు పెట్టి ఉంటాడని సాక్షి మరో కారణంగా చెప్పింది.

సూరికి, భానుకు మధ్య ఆస్తి తగాదాలు చోటు చేసుకున్నాయని, సూరికి చెందిన 300 కోట్ల రూపాయల విలువ చేసే ఆస్తులు భాను పేర ఉన్నాయని, వాటిని తమ పేరు మీదికి మార్చాలని సూరి ఒత్తిడి తెస్తున్నాడని, దాంతో భాను సూరిని అంతం చేసి ఉంటాడని మరో కారణంగా సాక్షి వివరించింది. పరిటాల వర్గీయులు సూరిని హత్యకు ప్లాన్ చేశారా అనే కోణం నుంచి కూడా పోలీసులు దర్యాప్తు చేస్తున్నట్లు తెలిపింది. జైలులో ఉన్న పోతుల సురేష్, బెల్గాంలో ఉన్న చమన్ సూరి హత్యకు ఒప్పందం చేసుకున్నారని, అందుకు 20 కోట్లు ఇవ్వడానికి అంగీకరించారని, 9 కోట్ల రూపాయల చెల్లింపు కూడా జరిగిందని, ఇది సూరి హత్యలో దర్యాప్తునకు నోచుకున్నమరో కోణమని సాక్షి టీవీ చానెల్ వివరించింది. సూరి హత్యలో విజయవాడకు చెందిన తెలుగుదేశం పార్టీకి చెందిన ఓ నాయకుడి పాత్ర ఉన్నట్లు కూడా అనుమానాలు వ్యక్తమవుతున్నాయని చెప్పింది.

రామ్ గోపాల్ వర్మ తీసిన రక్తచరిత్ర సినిమా లాభాలు కూడా హత్యకు కారణమై ఉండవచ్చునని వ్యాఖ్యానించింది. ఆ తర్వాత సూరి పెట్టుబడులు పెట్టిన రెండు భారీ సినిమాలు ఫ్లాప్ అయ్యాయని సాక్షి టీవీ చానెల్ వ్యాఖ్యానించింది. రాయలసీమ ఫాక్షనిజానికి దివంగత నేత వైయస్ రాజశేఖర రెడ్డి కోణంలో సాక్షి టీవీ చానెల్ ముక్తాయింపు ఇచ్చింది. వైయస్ చర్యల వల్ల రాయలసీమలో చాలా వరకు ఫాక్షనిజం తగ్గిందని చెప్పింది.