అన్ని కోట్లు ఎలా సంపాదించాడు!: జగన్‌పై కోదండరాం పరోక్ష విమర్శ

హైదరాబాద్: మాజీ పార్లమెంటు సభ్యుడు వైఎస్ జగన్మోహన్ రెడ్డిపై తెలంగాణ ఐక్య కార్యాచరణ సమితి చైర్మన్ ప్రొఫెసర్ కోదండరాం పరోక్ష విమర్శలు చేశారు. గతంలో రూ.50వేల పన్ను కట్టిన వ్యక్తి ఇప్పుడు 50 కోట్ల పన్ను కట్టే స్థాయికి ఎలా ఎదిగాడని బుధవారం ప్రశ్నించారు. గణతంత్ర దినోత్సవం సందర్భంగా కోదండరాం టిఏజేఎసి ఆధ్వర్యంలో జాతీయ జెండాను ఆవిష్కరించారు. జాతీయ జెండాతో పాటు తెలంగాణ జెండాను కూడా ఎగురవేశారు. అనంతరం ఆయన మాట్లాడారు. తెలంగాణ సీమాంధ్ర నేతల గుత్తాధిపత్యంలో ఉందని అన్నారు. ఇప్పుడు తెలంగాణకు విముక్తి కావాలని అన్నారు.

సీమాంధ్ర గుత్తాధిపత్యంలో చిక్కుకున్నందువల్లే తెలంగాణకు న్యాయం జరగడం లేదన్నారు. కేంద్ర ప్రభుత్వం కూడా సీమాంధ్రుల గుత్తాధిపత్యంలో చిక్కుకున్నదన్నారు. అందుకే స్విస్ బ్యాంకులలో అక్రమార్కులు దాచిపెట్టిన నల్లధనం వివరాలు వెల్లడించటం లేదని ఆరోపించారు.