ఎమ్మెల్సీ ఎన్నికల పోరు, క్యాంపు రాజకీయాలు జోరు

హైదరాబాద్: స్థానిక సంస్థల కోటాలో జరిగే ఎమ్మెల్సీ ఎన్నికలు రసవత్తరంగా మారాయి. ఈ ఎన్నికల్లో విజయం కోసం అభ్యర్థులు ఇప్పటికే క్యాంపు రాజకీయాలను ప్రారంభించినట్లు వార్తలు వస్తున్నాయి. ఈ ఎన్నికల్లో ఓటర్లయిన కార్పొరేటర్లు, కౌన్సిలర్లు, జడ్పీటీసీ, ఎంపీటీసీ సభ్యులు ఫిరాయించకుండా అభ్యర్థులు జాగ్రత్త పడుతున్నారు. అన్ని జిల్లాల్లో కాంగ్రెస్‌ పార్టీ అభ్యర్థులను దింపుతోంది. తెలుగుదేశం కడప తప్ప ఇతర అన్ని చోట్లా పోటీ చేస్తోంది. తాము పోటీ చేయబోమని వైయస్ జగన్ చెప్పినప్పటికీ కొన్ని చోట్ల వ్యూహాత్మకంగా అభ్యర్థులను పోటీకి దింపుతున్నారు.

అయితే అందరినీ ఒకే దగ్గర కాకుండా యాభైమందికి, వందమందికి ఒక శిబిరం చొప్పున ఏర్పాట్లు చేస్తూ బెంగళూరు, గోవా, కేరళ తదితర ప్రాంతాలకు తరలిస్తున్నారు. స్థానిక సంస్థలకు నామినేషన్ల తుదిగడువు ఈ నెల నాలుగు. కొన్ని చోట్ల ఇంకా నామినేషన్‌ వేయని అభ్యర్థులు కూడా ఓటర్లను ముందుగానే క్యాంపులకు తరలించినట్లు తెలుస్తోంది. వైయస్ జగన్ వల్ల, తమ పదవీ కాలం త్వరలో ముగియనున్నందున అధికార పార్టీ స్థానిక సంస్థల ప్రతినిధులు కాంగ్రెసు అభ్యర్థులకే ఓటేస్తారనే నమ్మకం లేకుండా పోయింది.

దీంతో క్యాంపు రాజకీయాలు ఊపందుకున్నట్లు చెబుతున్నారు. క్యాంపు రాజకీయాల వల్ల అభ్యర్థుల ఎన్నికల ఖర్చు విపరీతంగా పెరిగినట్లు కూడా చెబుతున్నారు. క్యాంపులు తదితర ఎన్నికల అవసరాలకు ఒక్కో అభ్యర్థికి రూ.ఆరు కోట్ల నుంచి రూ.పన్నెండు కోట్ల వరకు ఖర్చవుతుందని నేతలు అంచానా వేస్తున్నట్లు వార్తలు వచ్చాయి. దీన్ని దృష్టిలో ఉంచుకునే ప్రధాన పార్టీలు ఆర్థికంగా బలమైన వారినే ఎంపిక చేశాయి.

English summary

Camp politics increased in MLC election to be held for local bodies constituencies. Congress is very eager to win election in manner. so, its candidates are organizing camps in other states.