వికీలీక్స్‌పై అట్టుడికిన పార్లమెంటు, పిఎం రాజీనామాకు డిమాండ్

న్యూ ఢిల్లీ : వికిలీక్స్ వెల్లడించిన విషయాలు భారత పార్లమెంటును తీవ్రంగా కుదిపేశాయి ప్రధానమంత్రి డాక్టర్ మన్‌మోహన్ సింగ్ తక్షణం పదవికి రాజీనామా చేయాలని ప్రతిపక్షాలు గురువారంనాడు పార్లమెంటు ఉభయ సభలలోనూ డిమాండ్ చేశాయి. ప్రభుత్వానికి అధికారంలో కొనసాగే నైతిక హక్కులేదని ప్రతిపక్షాలు దుమ్మెత్తిపోశాయి. అమెరికాతో అణు సహకార ఒప్పందం కుదుర్చుకోవడాన్ని వామపక్షాలు వ్యతిరేకించిన నేపథ్యంలో క్రిందటి లోక్‌సభలో జరిగిన ఓటింగులో కాంగ్రెస్ నాయకులు కోట్లకు కోట్లు వెచ్చించి ప్రజాప్రతినిధులను తమవైపు తిప్పుకున్నారంటూ వికిలీక్స్ వెల్లడించడం పార్లమెంటు ఉభయ సభలలోనూ ప్రకంపనాలు సృష్టించింది.

మన్మోహన్ సింగ్ ప్రభుత్వం ఎన్నో నీతి సూత్రాలు వల్లె వేస్తున్నదని, కాని ఎన్ని కబుర్లు చెప్పినా ప్రభుత్వంలో కొనసాగే నైతిక హక్కు ఈ ప్రభుత్వం ఎప్పుడో కోల్పోయిందని, ఇంత జరిగినా ఇంకా అధికారంనుంచి ఎందుకు తప్పుకోరని భారతీయ జనతా పార్టీ నాయకులు సుష్మా స్వరాజ్, ఎల్.కె. అద్వాని, అరుణ్ జైట్లీ ఉభయ సభలలోనూ ప్రభుత్వాన్ని నిలదీశారు. ప్రభుత్వం అవినీతికి పాల్పడిందన్న వాదాన్ని పునరుద్ఘాటిస్తూ వామ పక్షాలు కూడా ప్రభుత్వాన్ని నిలదీయడంలో భారతీయ జనతా పార్టీతో గొంతు కలిపాయి.

అయితే ఎప్పుడో 14 వ లోక్ సభలో జరిగినవని చెబుతున్న అంశాలతో ప్రస్తుత 15 వ లోక్ సభకు సంబంధం లేదని ఆర్థిక శాఖ మంత్రి ప్రణబ్ ముఖర్జీ ప్రభుత్వాన్ని గట్టిగా సమర్ధించారు. 14 వ లోక్ సభ ఎప్పుడో రద్దు అయ్యిందన్న విషయాన్ని గుర్తు చేస్తూ ప్రజల చేత ఎన్నుకున్న 15 వ లోక్‌సభ కే ప్రస్తుత ప్రభుత్వం జవాబుదారీ గాని ముగిసిపోయిన 14 వ లోక్ సభలో జరిగినవని చెబుతున్న అంశాలకు కాదని ఆయన వివరించారు.

English summary

The 2008 'cash-for-votes' scam today returned to haunt the UPA with a united Opposition in Parliament demanding resignation of Prime Minister Manmohan Singh in view of fresh charges that bribe was paid during the trust vote but the government was dismissive. Citing correspondence between the US Embassy and its government revealed by the Wikileaks, the Opposition parties created uproar in both Houses of Parliament, saying the appearance of the media reports had "shamed" the country and it showed the "murder of democracy".