వికీలీక్స్ పచ్చి నిజం, సిగ్గుపడాలి: ప్రధానిపై చంద్రబాబు ధ్వజం

హైదరాబాద్: కేంద్ర ప్రభుత్వం విషయంలో వికీలీక్స్ బయట పెట్టిన వాస్తవాలలో పూర్తి నిజం ఉందని తెలుగుదేశం పార్టీ అధ్యక్షుడు చంద్రబాబునాయుడు శుక్రవారం ఎన్టీఆర్ ట్రస్ట్ భవన్‌లో ఏర్పాటు చేసిన సమావేశంలో అన్నారు. కేంద్ర ప్రభుత్వం అధికార వ్యామోహంతో అవినీతి, అక్రమాలకు పాల్పడుతోందన్నారు. కేంద్రం తప్పుల మీద తప్పులు చేస్తూ తప్పులు కప్పి పుచ్చుకోవడానికి మరిన్ని తప్పులు చేస్తోందన్నారు. న్యూక్లియర్ డీల్ తొందరపాటు చర్యగా అప్పుడు టిడిపి చెప్పిందని, దానిపై పార్లమెంటులో చర్చించాలని పట్టుబట్టినప్పటికీ కేంద్రం వినిపించుకోలేదన్నారు.

ప్రభుత్వాన్ని గట్టెక్కించుకోవడానికి ఎంపీలను కొనుగోలు చేయడం నీతిమాలిన చర్య అన్నారు. ఎంపీల కొనుగోలుకు ఆదికేశవలునాయుడే ప్రత్యక్ష సాక్షి అని చెప్పారు. అధికారమే పరమావధిగా కేంద్రం చూస్తుందన్నారు. సతీష్ శర్మ అనుచరుడు వోట్ ఆఫ్ కాన్ఫడెన్సులో గెలవడానికి డబ్బులు ముట్టజెప్పినట్టు ఆరోపణలు వచ్చాయన్నారు. మాజీ ప్రధాని వాజపాయి అల్లుడు రంజన్ భట్టాచార్యను కూడా లొంగదీసుకోవడానికి ప్రయత్నాలు చేశారన్నారు. ప్రపంచంలో అత్యున్నత ప్రజాస్వామ్య వ్యవస్థ కలిగిన భారత్‌కు పార్లమెంటులో ఎంపీల కొనుగోలు దురదృష్టకరమన్నారు.

అవినీతి, అక్రమాలకు పూర్తి బాధ్యుడు మన్మోహన్ సింగ్ అన్నారు. మన్మోహన్ సింగ్ తనకేమీ పట్టనట్టుగా వ్యవరిస్తున్నారన్నారు. ఈ దేశంలో జరిగిన వాటికి బాధపడాల్సింది, సిగ్గుపడాల్సింది పోయి, ప్రధాని మాటలు వాటిని సమర్థిస్తున్నట్లుగా ఉండటం శోచనీయమన్నారు. నిస్సహాయంగా ఉన్న ప్రధాని సంకీర్ణ రాజకీయల వైఫల్యం అని చెప్పడం సరికాదన్నారు. 2జి స్పెక్ట్రం తదితర కుంభకోణాలపై సుప్రీంకోర్టు మొట్టిన తర్వాతే జెపిసి వేశారన్నారు. మరో కేంద్రమంత్రి అవిశ్వాసంలో నోటుకు ఓటుపై అది గత సభలో విషయమని, ఇది 15వ లోక సభ అనిచెప్పడం విడ్డూరమన్నారు. రాజా అనుచరుడు బచ్చా అనుమానాస్పద స్థితిలో మృతి చెందిన విషయాన్ని బాబు గుర్తు చేశారు.

English summary

TDP president Chandrababu naidu said today that wikileaks is very fact. He blamed Congress government on nuclear deal, 2g specrum and commonwealth games.