జైపాల్‌ రెడ్డి, సబితారెడ్డిలపై కోడిగుడ్లు పడవా: జెఏసి చైర్మన్ కోదండరామ్

హైదరాబాద్: కేంద్రమంత్రి జైపాల్ రెడ్డి, హోంమంత్రి సబితా ఇంద్రారెడ్డి ప్రత్యేక తెలంగాణ రాష్ట్ర విషయంపై గప్ చుప్‌గా ఉంటే వారిపై కోడిగుడ్లు పడవా అని తెలంగాణ రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరాం మంగళారం ప్రశ్నించారు. వారు తెలంగాణ కోసం జరుగుతున్న ఆందోలనలో పాల్గొనాలని కోరారు. లేదంటే తెలంగాణ ప్రజలు వారిని ఖచ్చితంగా అడ్డుకుంటారని చెప్పారు. తెలంగాణకు చెందిన ప్రజా ప్రతినిధులు కడప జిల్లా ఉప ఎన్నికలలో పాల్గొనే బదులు తెలంగాణ ఉద్యమంలో చురుగ్గా పాల్గొంటే ప్రజలు హర్షిస్తారని సూచించారు.

మే తర్వాత తెలంగాణ ఉద్యమాన్ని ఉధృతం చేస్తామని ఆయన చెప్పారు. ఉద్యమ కార్యాచరణ రూపొందిస్తున్నామని అన్నారు. టాంకుబండుపై పెట్టాలనుకుంటున్న విగ్రహాలపై ప్రభుత్వం కాస్త సంయమనం పాటిస్తే మంచిదని సూచించారు. ప్రభుత్వం విడుదల చేసిన 177 చట్టాన్ని వెంటనే పూర్తిగా రద్దు చేయాలని ఆయన డిమాండ్ చేశారు. లేదంటే తెలంగాణ వ్యాప్తంగా అందరూ 177 చట్టాన్ని పూర్తిగా రద్దు చేసే వరకు ఆందోళన నిర్వహిస్తారని హెచ్చరించారు.

English summary

Telangana political JAC chairman Kodandaram questioned home minister Sabitha Indra Reddy and central minister Jaipal Reddy attitude on Telangana. He said they will increase Telangana agitation from May.