మంత్రి రఘవీరాపై రాళ్ల వర్షం: దాడి చేస్తామని చిరుకు మరోసారి బెదిరింపు

By Srinivas

Published: Monday, May 2, 2011, 13:53 [IST]

కడప: మూడు రోజుల క్రితం ప్రజారాజ్యం పార్టీ అధ్యక్షుడు చిరంజీవిపై కోడిగుడ్లు, చెప్పులు, రెండు రోజుల క్రితం తెలుగుదేశం పార్టీ అధ్యక్షుడు చంద్రబాబునాయుడుపై కర్రలు, రాళ్లతో మాజీ పార్లమెంటు సభ్యుడు వైయస్ జగన్మోహన్ రెడ్డికి చెందిన వైయస్ఆర్ కాంగ్రెసు పార్టీ కార్యకర్తలు సోమవారం దాడి చేశారనే వార్తలు వచ్చిన విషయం తెలిసిందే. అయితే సోమవారం వారు మరో దాడికి పాల్పడ్డట్టుగా తెలుస్తోంది. మంత్రి రఘువీరారెడ్డి కమలాపురంలో ప్రచారం చేస్తున్న సమయంలో పలువురు వైయస్ఆర్ కాంగ్రెసు పార్టీ కార్యకర్తలు రఘువీరారెడ్డిపై రాళ్లతో దాడి చేశారు.

మంత్రికి రఘువీరాకు ఓ రాయి తగలడంతో గాయమైంది. ఆయనను వెంటనే ఆసుపత్రికి తరలించినట్లుగా తెలుస్తోంది. అయితే రఘువీరాపై దాడి చేసిన అనంతరం కమలాపురంలో ప్రచారం చేస్తున్న చిరంజీవిపై దాడి చేస్తామని హెచ్చరించినట్లుగా సమాచారం. కాగా మంత్రి రఘువీరా తన ప్రచారంలో జగన్‌పై విమర్శలు గుప్పించారు. చంద్రబాబు, చిరంజీవిలపై దాడి సరికాదన్నారు. వైయస్ఆర్ కాంగ్రెసు, టిడిపికి ఓటు వేస్తే దున్నపోతుకు ఓటు వేసినట్టేనని అన్నారు.

Published On May 2, 2011