తెలంగాణపై చంద్రబాబు మాట కూడా వినను: నాగం జనార్దన్ రెడ్డి

By Pratap

Published: Tuesday, May 3, 2011, 17:52 [IST]

మహబూబ్‌నగర్: తెలంగాణ విషయంలో తాను తమ పార్టీ అధినేత చంద్రబాబు నాయుడి మాట కూడా వినబోనని తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి అన్నారు. తెలంగాణ ఉద్యమానికి ప్రజలు నాయకత్వం వహిస్తున్నారని, ప్రజల వెంట తాను నడుస్తానని ఆయన మంగళవారం మీడియా ప్రతినిధులతో అన్నారు. అన్ని పార్టీలు ఏకమై పోరాటం చేస్తేనే తెలంగాణ రాష్ట్రం సాధించుకోగలమని ఆయన అన్నారు. ఏ పార్టీ అయినా తెలంగాణపై స్పష్టమైన ప్రకటన చేయాల్సిందేనని, ఆలా చేయని పార్టీలకు తెలంగాణలో మనుగడ ఉండదని ఆయన అన్నారు.

తాను పార్టీలకు వ్యతిరేకం కాదని, తెలంగాణ వ్యతిరేక శక్తులకు మాత్రమే వ్యతిరేకమని ఆయన అన్నారు. తెలంగాణ కోసం మంత్రి జూపల్లి కృష్ణా రావు చేస్తున్న పాదయాత్రకు ఆయన మద్దతు తెలిపారు. తెలంగాణ సాధన కోసం జూపల్లి కృష్ణారావు కొద్ది రోజులుగా మహబూబ్ నగర్ జిల్లాలో పాదయాత్ర చేస్తున్నారు. తన పాదయాత్రకు ప్రజల నుంచి మంచి స్పందన లభిస్తోందని ఆయన మంగళవారం అన్నారు.

Published On May 3, 2011