ప్రణబ్‌కు కాదు చిదంబరంకు: చంద్రబాబును ఇరుకున పెడుతున్న నాగం

హైదరాబాద్: తెలుగుదేశం పార్టీ సీనియర్ శాసనసభ్యుడు నాగం జనార్ధన్ రెడ్డి ఆ పార్టీ అధ్యక్షుడు నారా చంద్రబాబునాయుడిని రోజు రోజుకు ఇరుకున పెట్టే వ్యాఖ్యలు చేస్తున్నారు. తాజాగా మంగళవారం బాబును మరింత ఇరుకున పెట్టే వ్యాఖ్యలు చేశారు. కాలం చెల్లిన ప్రణబ్ ముఖర్జీ కమిటీకి కాకుండా ప్రత్యేక తెలంగాణ రాష్ట్రం కోసం టిడిపి చేసిన తీర్మానాన్ని కేంద్ర మంత్రి చిదంబరానికి పంపాలని ఆయన పార్టీని డిమాండ్ చేశారు. కాగా ఈ నెల 20న పార్టీ విస్తృత స్థాయి సమావేశానికి, 23న గన్ పార్కు నుండి యాదగిరిగుట్ట వరకు నిర్వహిస్తున్న పాదయాత్రకు హాజరు కావాలా వద్దా అనే విషయంపై ఇంకా నిర్ణయం తీసుకోలేదని నాగం చెప్పారు. తెలుగుదేశం పార్టీ మహానాడులో ఏకవ్యాఖ్య తీర్మానం చేస్తుందని తాను భావిస్తున్నట్టు చెప్పారు.

ఇన్నాళ్లు టిడిపి తాము తెలంగాణ కోసం ప్రణబ్ కమిటీకి లేఖ రాశామని చెప్పుకొచ్చేది. అయితే నాగం కాలం చెల్లిన ప్రణబ్‌కు కాకుండా చిదంబరానికి రాయాలని చెప్పడంతో చంద్రబాబును మరింత ఇరుకున పెట్టారు. దీంతో ఇప్పటికే నాగంకు, టిడిపికి ఉన్న గ్యాప్ మరింత పెరిగే అవకాశం కనిపిస్తోంది. చిదంబరానికే ఖచ్చితంగా లేఖ రాయాలని చంద్రబాబుకు నాగం సూచించడంతో అధినేత ఆయనపై మరింత అగ్రహం వ్యక్తం చేసే అవకాశం కనిపిస్తోంది. నాగం వ్యాఖ్యలు కేవలం టిడిపిలోనే కాకుండా రాష్ట్రవ్యాప్తంగా కాకా పుట్టిస్తున్నాయి. నాగం వ్యాఖ్యల కారణంగా సీమాంధ్ర టిడిపి నేతలు సమైక్యాంధ్ర నినాదాన్ని గట్టిగా తెరపైకి తెచ్చే అవకాశం కనిపిస్తోంది.

English summary

TDP president Chandrababu Naidu is in crisis with party senior MLA Nagam Janardhan Reddy comments. Nagam demanded party to write letter to Chidambaram on Telangana issue.