కాంగ్రెసు నేతల్లో మంచివారు: చంద్రబాబు నోట వింతైన మాట

By Srinivas

Published: Thursday, May 19, 2011, 11:59 [IST]

హైదరాబాద్: అధికార కాంగ్రెసు పార్టీలో కొందరు మంచి వారు ఉన్నారని తెలుగుదేశం పార్టీ అధ్యక్షుడు నారా చంద్రబాబునాయుడు గురువారం కొత్త రాగం అందుకున్నారు. రైతుల సమస్యలపై ప్రభుత్వం నిర్లక్ష్యం వహిస్తుందంటూ టిడిపి ఆధ్వర్యంలో రాష్ట్రవ్యాప్తంగా రాస్తారోకో కార్యక్రమాలు చేపట్టారు. ఇందులో భాగంగా చంద్రబాబునాయుడు మహబూబ్ నగర్ జిల్లా మరికల్‌లో జరిగిన రాస్తారోకోలో పాల్గొన్నారు. ఈ సందర్భంగా ఆయన మాట్లాడుతూ కాంగ్రెసులో కొందరు మంచి వారున్నారని వారంతా రైతులకు బాసటగా నిలవాలని కోరారు. రైతు సమస్యలపై పోరాటానికి కలిసి రావాలని ఆయన వారికి సూచించారు. రైతుల తరఫున వారు పోరాటం చేస్తూ ముఖ్యమంత్రి కిరణ్ కుమార్ రెడ్డి వైఫల్యాలని ఎత్తి చూపాలని విజ్ఞప్తి చేశారు.

రైతులకు న్యాయం చేసేందుకే రాస్తారోకో కార్యక్రమాన్ని చేపట్టినట్టు చెప్పారు. ప్రయాణీకులకు ఇబ్బందులు ఎదురవుతుండ వచ్చునని అందుకు వారు క్షమించాలని కోరారు. చంద్రబాబు ఎడ్లబండిపై వచ్చి రోడ్డుపై బైఠాయించి తన నిరసన తెలిపాడు. కాగా రాష్ట్రవ్యాప్తంగా పలు జిల్లాల్లో టిడిపి ఆందోళన, రాస్తారోకో కార్యక్రమాలు నిర్వహించింది. విజయవాడలో ఆందోళన చేస్తున్న ఎమ్మెల్యే దేవినేని ఉమామహేశ్వరరావును పోలీసులు అరెస్టు చేశారు.

Published On May 19, 2011