కిరణ్ కుమార్ రెడ్డికి వైయస్ జగన్ భయం: ఇద్దరు మంత్రులపై ఫిర్యాదు

హైదరాబాద్: ముఖ్యమంత్రి కిరణ్ కుమార్ రెడ్డిని వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి భయం వెంటాడుతూనే ఉన్నట్లుంది. తమ మంత్రివర్గంలోని ఇద్దరు మంత్రులు వైయస్ జగన్‌కు సమాచారం చేరవేస్తున్నారని ముఖ్యమంత్రి కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌కు ఫిర్యాదు చేసినట్లు తెలుస్తోంది. వారిద్దరిని మంత్రివర్గం నుంచి తొలగించేందుకు అనుమతి ఇవ్వాలని ఆయన కోరినట్లు తెలుస్తోంది. ఆ ఇద్దరు మంత్రులకు భయపడే ఈ నెల 16వ తేదీన జరగాల్సిన మంత్రివర్గ సమావేశాన్ని నిర్వహించలేదని వార్తలు వస్తున్నాయి.

గత నెల 16వ తేదీన మంత్రివర్గ సమావేశం జరిగింది. ఆ ఇద్దరు మంత్రులు వైయస్ జగన్‌కు సమాచారం అందిస్తారనే ఉద్దేశంతోనే తాను మంత్రివర్గ సమావేశాన్ని ఏర్పాటు చేయలేకపోతున్నానని ఆయన ఆజాద్‌తో చెప్పినట్లు సమాచారం. ఆ ఇద్దరు మంత్రులు కూడా కోస్తాంధ్రకు చెందినవారని, శాఖలు కేటాయించగానే తిరుగుబాటు బావుటా ఎగురవేసినవారని తెలుస్తోంది. తాను ఈ విషయాన్ని పార్టీ అధ్యక్షురాలు సోనియా గాంధీకి చెప్పి, మంత్రివర్గ పునర్వ్యస్థీకరణకు అనుమతి ఇవ్వాలని కోరుతానని ఆజాద్ ముఖ్యమంత్రికి చెప్పినట్లు తెలుస్తోంది.

దానికి తోడు, నలుగురు మంత్రులకు చెందిన కుటుంబ సభ్యులు జగన్ వెంట నడుస్తున్నారని, వారిని కూడా తొలగించడానికి అనుమతి ఇవ్వాలని కిరణ్ కుమార్ రెడ్డి ఆజాద్‌తో చెప్పినట్లు సమాచారం. తన వ్యవహార శైలిపై పలువురు ఫిర్యాదులు చేసిన నేపథ్యంలో ముఖ్యమంత్రి ఆ విషయాలపై ఆజాద్‌కు వివరణ ఇచ్చినట్లు తెలుస్తోంది.

English summary

Chief minister N Kiran Kumar Reddy has complained to AICC general secretary Ghulam Nabi Azad that two of his ministers were leaking information to YSR Congress president Y S Jaganmohan Reddy and sought permission to remove them from his cabinet.