చంద్రబాబుపై ఒత్తిడి చేయండి: టిడిపి ఎమ్మెల్యేలకు నాగం ఎస్సెమ్మెస్‌లు

హైదరాబాద్: తెలుగుదేశం పార్టీ సస్పెన్షన్‌కు గురైన శాసనసభ్యుడు, మాజీ మంత్రి నాగం జనార్దన్ రెడ్డి ఆదివారం తెలంగాణ ప్రాంతానికి చెందిన తెలుగుదేశం పార్టీ సభ్యులకు సంక్షిప్త సందేశాలు(ఎస్సెమ్మెస్‌లు) పంపారు. మూడు రోజుల మహానాడులో రెండు రోజులు తెలంగాణపై ఎలాంటి చర్చ జరగలేదని మూడో రోజు అయినా తెలంగాణపై స్పష్టమైన తీర్మానం ప్రవేశ పెట్టవలసిందిగా కోరుతూ తెలుగుదేశం పార్టీ అధినేత చంద్రబాబునాయుడును కోరాలని అవసరమైతే ఆయనపై ఒత్తిడి తీసుకు రావాలని నాగం తెలంగాణ టిడిపి ఎమ్మెల్యేలకు ఎస్సెమ్మెస్‌లు పంపారు.

తెలంగాణపై చంద్రబాబు స్పష్టమైన వైఖరి తీసుకుంటేనే తెలంగాణ ప్రాంతంలో టిడిపి ఉంటుందని గత కొద్ది రోజులుగా నాగం జనార్దన్ రెడ్డి పార్టీని, అధినేతను డిమాండ్ చేసి సస్పెన్షన్‌కు గురైన విషయం తెలిసిందే. పార్టీ నుండి సస్పెన్షన్‌కు గురైన తర్వాత కూడా నాగం టిడిపిని టార్గెట్ చేయడం మానలేదు. తెలంగాణపై తీర్మానం చేసేలా అధినేతపై ఒత్తిడి చేయాలని టిడిపి ఎమ్మెల్యేలకు మెసేజ్‌లు పంపడం ద్వారా ఆయన బాబుపై తీవ్ర ఒత్తిడి పెంచడం విశేషం. తాను సస్పెండ్ అయినా తెలంగాణపై పట్టు వీడేది లేదని చెప్పడానికే నాగం ఇలాంటి చర్యలకు పాల్పడుతున్నాడనే వాదనలు వినిపిస్తున్నాయి.