వైయస్ జగన్‌తో వెళుతున్న ఎమ్మెల్యేలపై చర్యలు: తులసి రెడ్డి

By Srinivas

Published: Monday, June 13, 2011, 14:06 [IST]

హైదరాబాద్: వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి చేపట్టిన సాగుపోరు దీక్షలో కాంగ్రెసు పార్టీ శాసనసభ్యులపై పార్టీ అధిష్టానం చర్యలు తీసుకుంటుందని ఏడుసూత్రాల కమిటీ చైర్మన్ ఎన్.తులసీరెడ్డి సోమవారం అన్నారు. రైతాంగ సమస్యలు అంటూ వైయస్ఆర్ కాంగ్రెసు చేపట్టిన ఆందోళనలో కాంగ్రెసు ఎమ్మెల్యేలు ఎవరు పాల్గొన్నా ఉపేక్షించేది లేదన్నారు. వారు జగన్ చేపట్టిన ఆందోళనలో పాల్గొనడాన్ని తీవ్రంగా పరిగణిస్తున్నామని చెప్పారు.

రైతాంగ సమస్యలపై ఏదైనా చెప్పాలను అనుకుంటే సదరు ఎమ్మెల్యేలు పార్టీ వేదికపై చర్చించాల్సి ఉండేదన్నారు. జగన్ వెంట ఉంటూ ప్రభుత్వాన్ని విమర్శించే వారిపై తప్పకుండా చర్యలుంటాయని హెచ్చరించారు. అయితేఅన్ని విషయాలు చర్చించాకే అధిష్టానం తుది నిర్ణయం తీసుకుంటుందని స్పష్టం చేశారు.

Published On June 13, 2011