ప్రభుత్వాన్ని కూల్చే దమ్ము వైయస్ జగన్‌కు లేదు: సోమిరెడ్డి

By Pratap

Published: Tuesday, June 14, 2011, 17:22 [IST]

హైదరాబాద్‌: ముఖ్యమంత్రి కిరణ్ కుమార్ రెడ్డి ప్రభుత్వాన్ని కూల్చే దమ్ములు వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి లేవని తెలుగుదేశం పార్టీ నాయకుడు సోమిరెడ్డి చంద్రమోహన్ రెడ్డి అన్నారు. కాంగ్రెసు పార్టీతో తమ పార్టీ ఎన్నిటికీ కుమ్మక్కు కాదని ఆయన మంగళవారం మీడియా ప్రతినిధుల సమావేశంలో స్పష్టం చేశారు. తెలుగుదేశం పార్టీని దెబ్బ తీయడం జగన్ తరం కాదని ఆయన అన్నారు. రాష్ట్ర ప్రభుత్వాన్ని జగన్ వర్గం శానససభ్యులే కాపాడుతున్నారని ఆయన అన్నారు.

కాంగ్రెస్‌తో తాము కుమ్మక్కయ్యామని వైఎస్‌ జగన్‌ తప్పుడు ప్రచారం చేస్తున్నారని సోమిరెడ్డి చంద్రమోహన్‌రెడ్డి అన్నారు. తాము అవిశ్వాసం పెడితే, స్పీకర్‌ ఎన్నికల్లో కిరణ్‌కుమార్‌రెడ్డి ప్రభుత్వాన్ని కాపాడింది జగన్‌ వర్గం ఎమ్మెల్యేలేనని సోమిరెడ్డి గుర్తుచేశారు. చంద్రబాబు ముఖ్యమంత్రిగా ఉన్నప్పుడు వైఎస్‌ రాజశేఖర్‌రెడ్డి ఎందుకు అవిశ్వాసం పెట్టలేదని సోమిరెడ్డి ప్రశ్నించారు. చంద్రబాబుతో ఆనాడు వైఎస్‌ కుమ్మక్కయ్యారా అన్న విషయాన్ని జగన్‌ స్పష్టం చేయాలని ఆయన అన్నారు. జగన్‌ తన వర్గం శాసనసభ్యులతో గవర్నర్‌ వద్దకు బలప్రదర్శన చేయాలని, తద్వారా ప్రభుత్వాన్ని కూల్చాలని ఆయన సూచించారు.

Published On June 14, 2011